দেশজুৰি চলি থকা বিজেপিৰ সদস্যতা অভিযান ২০২৪ৰ দ্বিতীয় পৰ্যায় চলি আছে। সদস্যভৰ্তিৰ সংখ্যাৰে শীৰ্ষত আছে অসম। নিৰ্ধাৰিত লক্ষ্যৰ ৮৫ শতাংশ সদস্যভৰ্তি কৰি দেশৰ ভিতৰতে তালিকাৰ শীৰ্ষত স্থান লাভ কৰিবলৈ সক্ষম হৈছে অসম ৰাজ্যিক বিজেপি।

অসমৰ সদস্যভৰ্তিৰ সংখ্যাৰ ক্ষেত্ৰত শীৰ্ষত আছে ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই প্ৰতিনিধিত্ব কৰা জালুকবাৰী বিধানসভা সমষ্টি।

শনিবাৰে বিজেপিৰ ৰাষ্ট্ৰীয় সাধাৰণ সম্পাদক(সাংগঠনিক)বি এল সন্তোষে এই তথ্য সদৰী কৰে।

সামাজিক মাধ্যমযোগে তেওঁ জনায়, “বিজেপিৰ সদস্যতা অভিযান ২০২৪ৰ দ্বিতীয় পৰ্যায়ত প্ৰৱেশ কৰাৰ লগে লগে অসম বিজেপিয়ে নিৰ্ধাৰিত লক্ষ্যৰ ৮৫ শতাংশৰে শীৰ্ষত আছে। অসমৰ পিছতে হিমাচল প্ৰদেশ ৭৫ শতাংশ, মধ্য প্ৰদেশ ৭০ শতাংশ, গুজৰাট ৭০ শতাংশ, উত্তৰ প্ৰদেশ ৬৫ শতাংশ, উত্তৰাখণ্ড ৬৫ শতাংশ, অৰুণাচল প্ৰদেশ ৬৫ শতাংশ আৰু ত্ৰিপুৰা লক্ষ্যৰ ৬০ শতাংশত আছে। প্ৰতিখন ৰাজ্যিক নেতৃত্বলৈ অভিনন্দন৷”

উল্লেখ্য যে, অসমত সদস্যৰ সংখ্যাই অতিক্ৰম কৰিছে ৫০ লাখ। উত্তৰ প্ৰদেশ, মধ্যপ্ৰদেশ আৰু গুজৰাটৰ পিছত অসম হ’ল ৫০ লাখৰ ওপৰত সদস্য ভৰ্তি কৰা ৰাজ্য।