বিহাৰৰ ভাগলপুৰ জিলাৰ হাবিবপুৰ থানা এলেকাৰ পৰা মঙলবাৰে হঠাৎ বোমা বিস্ফোৰণৰ খবৰ পোহৰলৈ আহিছে। শ্বাহীগঞ্জ পঞ্চায়তৰ খিলাফত নগৰ স্থানীয় অঞ্চলত সংঘটিত হোৱা এই ঘটনাত ৭টা শিশু আহত হয়।

স্থানীয় অঞ্চলটোৰ ৰাজপথত শিশুসকলে খেলি থকা অৱস্থাত হঠাতে বিস্ফোৰণ ঘটে। ঘটনাৰ পিছত সমগ্ৰ অঞ্চলটোত বিশৃংখলতাৰ সৃষ্টি হয়।

আহত আটাইকেইটা শিশুক লগে লগে চিকিৎসালয়লৈ লৈ যোৱা হয়। তথ্য লাভ কৰাৰ লগে লগে আৰক্ষীয়ে সেই স্থানত উপস্থিত হৈ তদন্ত অব্যাহত ৰাখিছে। চিটি এছপি কে ৰামদাসে এই কথা নিশ্চিত কৰিছে।

ঘটনাৰ পিছতে পৰিয়ালৰ লোকৰ মাজত হুৱা-দুৱাৰ সৃষ্টি হয়। ততাতৈয়াকৈ আহত শিশুকেইটাক সদৰ চিকিৎসালয়ত চিকিৎসাৰ বাবে ভৰ্তি কৰোৱা হয়, য’ৰ পৰা গুৰুতৰভাৱে আহত তিনিটা শিশুক মায়াগঞ্জ হাস্পতাললৈ প্ৰেৰণ কৰা হৈছে।

চিটি এছপি কে ৰামদাসে কয় যে এই ঘটনাৰ পুংখানুপুংখ তদন্ত চলি আছে। ইয়াৰ পূৰ্বেও ঘটা কাণ্ডৰ ভিত্তিত তদন্ত আগবঢ়াই নিয়া হ’ব। এই ঘটনা কোনে সংঘটিত কৰিলে সেয়া জানিবলৈ চেষ্টা অব্যাহত ৰখা হৈছে। তদন্তৰ বাবে ডগ স্কোয়াড আৰু এফ এছ এল দলৰো সহায় লোৱা হৈছে।