কাশ্মীৰৰ বুডগামত সংঘটিত হৈছে এক ভয়ংকৰ দুৰ্ঘটনা। শুকুৰবাৰে বি এছ এফ জোৱানেৰে ভৰ্তি এখন বাছে নিয়ন্ত্ৰণ হেৰুৱাই দ’ খাৱৈত বাগৰি পৰাত ৪ জন জোৱান নিহত হোৱাৰ লগতে ২৮ জন জোৱান কম বেছি পৰিমানে আহত হয়।

আহত জোৱান কেইজনক ওচৰৰ চিকিৎসালয়ত ভৰ্তি কৰা হৈছে। দুৰ্ঘটনাত পতিত হোৱা এই বাছখনত মুঠ ৩৬ জন জোৱান আছিল।

তথ্য অনুসৰি জোৱানেৰে ভৰা বাছখন বুডগামৰ ব্ৰিল গাঁৱৰ সমীপত হঠাতে চালকজনে নিয়ন্ত্ৰণ হেৰুৱাই পেলায়। জানিব পৰা মতে, চালকজনে বাছখন নিয়ন্ত্ৰণ কৰিবলৈ যথেষ্ট চেষ্টা কৰিছিল যদিও তেওঁ বিফল হোৱাত বাছখন কিছু সময় ৰাস্তাত দোল খাই ৰাস্তাৰ পৰা কেইবা ফুট তলৰ খাৱৈত পৰি যায়।

দ’ খাৱৈত বাগৰি পৰাৰ লগে লগে এটা প্ৰচণ্ড শব্দ হোৱাত ঘটনাস্থলৰ সমীপৰ গাঁওসমূহৰ পৰা লোকসকল ওাই আহে। লগে লগে আৰক্ষী আৰু উদ্ধাৰকাৰী দলক দুৰ্ঘটনাৰ খবৰ দিয়াত সেই স্থানত উপস্থিত হৈ উদ্ধাৰ অভিযান আৰম্ভ কৰে।

বাছখনত থকা ৪ জন জোৱানে গুৰুতৰভাৱে আঘাতপ্ৰাপ্ত হোৱাত মৃত্যুক আঁকোৱালি লয় আৰু আহত হোৱা বাকী ২৮জন জোৱানৰ বৰ্তমান চিকিৎসা চলি আছে।