ডিজিটেল ডেস্কঃ বিতৰ্কিত নাগৰিকত্ব সংশোধনী আইনৰ জৰিয়তে পুনৰ ভাৰতীয় নাগৰিকত্ব লাভ কৰিবলৈ সক্ষম হ’ল ১৮৮ জন বিদেশী হিন্দু নাগৰিকে। দেওবাৰে আহমেদাবাদত আয়োজিত এক অনুষ্ঠানত ১৮৮ জন পাকিস্তানী হিন্দুক ভাৰতীয় নাগৰিকত্ব প্ৰদান কৰে কেন্দ্ৰীয় গৃহমন্ত্ৰী অমিত শ্বাহে।

এই উপলক্ষ্যে অনুষ্ঠিত অনুষ্ঠানত শ্বাহে ভাষণত কয়, “যেতিয়া বাংলাদেশত বিভাজন হৈছিল, তেতিয়া তাত ২৭ শতাংশ হিন্দু আছিল, আজি ৯ শতাংশ আছে। ক’লৈ গৈছে ইমান হিন্দু। চুবুৰীয়া দেশৰ পৰা ইমান হিন্দু ক’লৈ গৈছে। আমি ২০১৯ চনত CAA লৈ আহিছিলো। CAA ৰ বাবে, কোটি কোটি হিন্দু, জৈন আৰু শিখ ধৰ্মৰ লোকে নাগৰিকত্ব লাভ কৰিব।”

অমিত শ্বাহে আৰু কয় যে CAA সন্দৰ্ভত মুছলমানক উচটনি দিয়া হৈছিল। CAAৰ জৰিয়তে কাৰো নাগৰিকত্ব কাঢ়ি লোৱা নহয়। একাংশ ৰাজ্য চৰকাৰে CAAক লৈ মানুহক বিপথে পৰিচালিত কৰিছে। CAA সন্দৰ্ভত ইণ্ডিয়া এলায়েন্স আৰু কংগ্ৰেছে শৰণাৰ্থীসকলক বিপথে পৰিচালিত কৰিছে।

লগতে অমিত শ্বাহে ভাষণত প্ৰধানমন্ত্ৰী নৰেন্দ্ৰ মোদীৰো গুণানুকীৰ্তন কৰে। তেওঁ কয় যে প্ৰধানমন্ত্ৰী নৰেন্দ্ৰ মোদীয়ে পৰিয়ালবাদৰ বিৰুদ্ধে যুঁজিছে। নৰেন্দ্ৰ মোদীয়ে জাতিবাদৰ অন্ত পেলাইছে। ঔৰংগজেৱে কাশী বিশ্বনাথ মন্দিৰ ভাঙি পেলাইছিল যদিও মোদীয়ে পুনৰ নিৰ্মাণ কৰিছিল। নৰেন্দ্ৰ মোদীয়ে জম্মু-কাশ্মীৰৰ পৰা ৩৭০ অনুচ্ছেদ বিলুপ্ত কৰিলে। নৰেন্দ্ৰ মোদীয়ে তুষ্টিকৰণৰ অন্ত পেলাইছে।

অমিত শ্বাহে আৰু কয় যে কংগ্ৰেছ আৰু মিত্ৰশক্তিৰ তুষ্টিকৰণ নীতিৰ বাবে স্বাধীনতাৰ পিছত চুবুৰীয়া দেশৰ পৰা অহা নিৰ্যাতিত হিন্দু, বৌদ্ধ আৰু শিখসকলে ন্যায় নাপালে। এইসকল লোকে প্ৰতিশ্ৰুতিৰ পিছতো ভাৰতীয় নাগৰিকত্ব নাপালে। নৰেন্দ্ৰ মোদীয়ে এনে কোটি কোটি লোকক ন্যায় প্ৰদান কৰিছে। মই মোৰ সকলো শৰণাৰ্থী ভাইক কওঁ যে আপোনালোকে কোনো সংকোচ নোহোৱাকৈ নাগৰিকত্বৰ বাবে আবেদন কৰক। আপোনাৰ একো ভুল নহ’ব। ইয়াত কোনো অপৰাধমূলক গোচৰৰ কোনো ব্যৱস্থা নাই, আপোনাৰ ঘৰ, আপোনাৰ চাকৰি, সকলো অক্ষত অৱস্থাত থাকিব। বিৰোধীয়ে আপোনাক বিপথে পৰিচালিত কৰিছে।