বহু সময়ত মঞ্চত অনুষ্ঠান পৰিবেশনৰ সময়ত বহু শিল্পীয়ে বিভিন্ন আচৰণ কৰি আহিছে। কিছু শিল্পীৰ অভব্য আচৰণে লজ্জাৰ পৰিধি অতিক্ৰম কৰে। কিন্তু তাতোকৈ এক জঘন্য আচৰণ কৰি আজি চৰ্চাত অৰুণাচলৰ এগৰাকী শিল্পী। তেওঁৰ নাম ক’ন ৱাই ছন।

২৭ অক্টোবৰত ইটানগৰত অনুষ্ঠিত ‘ৰিপ্লে ইণ্ডিয়া ট্যুৰ’ শীৰ্ষক এক অনুষ্ঠানত সংগীত পৰিবেশনৰ মাজতে অৰুণাচল প্ৰদেশৰ ক’ন ৱাই ছন নামৰ এজন কণ্ঠশিল্পীজনে এটা কুকুৰাৰ ডিঙি কাটি সকলোৰে সন্মুখতে ৰক্তপান কৰে। এই ঘটনাই সকলোকে অবাক কৰি তুলিছে ।

কেৱল সেয়াই নহয় অনুষ্ঠান উপভোগ কৰি থকা দৰ্শকৰ মাজতো তীব্ৰ আলোড়নৰ সৃষ্টি কৰে । ইতিমধ্যে এই ৰক্তপিপাসু শিল্পীগৰাকীৰ উক্ত শিহৰণকাৰী দৃশ্যৰ ভিডিঅ’ ভাইৰেল হৈ পৰিছে। এই দৃশ্য প্ৰত্যক্ষ কৰাৰ পিছত শিল্পীগৰাকীৰ বিৰুদ্ধে সৰৱ হৈ পৰিছে নেটিজেনসকল।

আনহাতে, কুকুৰাৰ ডিঙি কাটি ৰক্তপান কৰা শিল্পীগৰাকীৰ বিৰুদ্ধে অৰুণাচল প্ৰদেশ আৰক্ষীয়ে এটা গোচৰ ৰুজু কৰিছে । তেওঁৰ অনুষ্ঠানৰ পোনপটীয়া সম্প্ৰচাৰৰ ভিডিঅ’ ছচিয়েল মিডিয়াত ভাইৰেল হোৱাৰ পিছতে বিভিন্ন ক্ষেত্ৰৰ বিভিন্ন ব্যক্তিৰ পৰা তীব্ৰ সমালোচনাৰ সন্মুখীন হ’বলগা হৈছে ।