Brahmaputra Times
বৃহস্পতিবাৰে সোণাপুৰৰ কচুতলিত প্ৰশাসনে চলোৱা উচ্ছেদ অভিযানৰ সময়ত সংঘটিত হিংসাত্মক ঘটনাত দুজন বেদখলকাৰীৰ মৃত্যু হোৱা প্ৰসংগত মন্তব্য কৰিছে মুখ্যমন্ত্রী হিমন্ত বিশ্ব শৰ্মাই।
উচ্ছেদ অভিযানৰ বিৰোধিতা কৰা কংগ্ৰেছ দলক লক্ষ্য কৰি মুখ্যমন্ত্রী শৰ্মাই আজি সংবাদ মেলৰ জৰিয়তে কেইবাটাও গুৰুত্বপূৰ্ণ মন্তব্য কৰে।
তেওঁ কয়, ‘প্ৰথমে শান্তিপূৰ্ণ ভাৱে উচ্ছেদ অভিযান চলি আছিল। কংগ্ৰেছে সভা পতাৰ পাছতেই বেদখলকাৰী সকল উত্তেজিত হ’ল’।
ট্ৰাইবেল বেল্ট আৰু ব্লক আইন খন কংগ্ৰেছৰ মুখ্যমন্ত্ৰী গোপনাথ বৰদলৈয়েই আনিছিল বুলি উল্লেখ কৰি কয়, ‘বৰ্তমান এনে অঞ্চলবোৰত সন্দেহজনক লোকসকল সোমাইছে। ৪-৫ বছৰত এনে অঞ্চলত জনসংখ্যা ২০-২৫ হাজাৰলৈ বৃদ্ধি পায়’।
চৰকাৰী ভূমি তথা এনে অঞ্চল সমূহত এনে লোকক একাংশ দালালে আনি সংস্থাপন কৰি দিয়ে বুলি অভিযোগ তুলি মুখ্যমন্ত্রী শৰ্মাই কয়, ‘এনে দালাল আমি চিনাক্ত কৰিছোঁ, গ্ৰেপ্তাৰ কৰিম এনে দালালক’।
কোটা বিৰোধী আন্দোলনত বাংলাদেশত যিবোৰ শ্লোগান ব্যৱহাৰ হৈছিল একেই শ্লোগান কালি সোণাপুৰত শুনিবলৈ পোৱা গৈছিল বুলিও গুৰুতৰ অভিযোগ তোলে মুখ্যমন্ত্রী শৰ্মাই।
তেওঁ লগতে কয়, ‘ৰে’ল ৰখাই দিয়া হৈছে , শিশুৰ পৰা বয়োজেষ্ঠলৈকে সকলোৱে লাঠী-দা লৈ আৰক্ষী-প্ৰশাসনক আক্ৰমণ কৰিছিল। ইয়াৰ বিৰুদ্ধে আৰক্ষীয়ে ব্যৱস্থা লৈ আছে, আজি DGP গৈছে কাইলৈ মই যাব পাৰোঁ’।
