বৰাক উপত্যকাত বান আৰু ভূমিস্খলনে ভয়ংকৰ ৰূপ ধৰিছে। উপত্যকাৰ বহু ঠাইত সৃষ্টি হোৱা এই প্ৰাকৃতিক দুৰ্যোগে সাধাৰণ জীৱনক বিপৰ্যস্ত কৰি তুলিছে। বৰাক নৈৰ বাঢ়নী পানীয়ে ইতিমধ্যে বহু এলাকা প্লাৱিত কৰিছে, যাৰ ফলত ৰাইজৰ জীৱন-জীৱিকা বিপন্ন হৈ পৰিছে। আনহাতে, একাধিক স্থানত ভূমিস্খলনে যাতায়ত ব্যৱস্থাও সম্পূর্ণৰূপে স্তব্ধ কৰি তুলিছে।

এই সংকটজনক পৰিস্থিতিৰ মাজতে আজি ৰাজ্যৰ মুখ্যমন্ত্ৰী হিমন্ত বিশ্ব শৰ্মাই বানাক্ৰান্ত অঞ্চল পৰিদৰ্শন কৰে। পুৱা ১০ বজাত শিলচৰত উপস্থিত হৈ তেওঁ প্ৰথমে চৰকাৰী বালক বিদ্যালয়ৰ আশ্ৰয় শিবিৰ পৰিদৰ্শন কৰে। তাৰ পিছত বানে ক্ষতিগ্ৰস্ত ৰাইজৰ দুখ-দুৰ্দশা, অভাৱ-অভিযোগৰ খবৰ লয়। এই ভ্ৰমণত তেওঁক মন্ত্ৰী পীযূষ হাজৰীকা, কৌশিক ৰায় আৰু কৃষ্ণেন্দু পাল এ সহায় কৰে। দিনটো জুৰি তেওঁ শিলচৰৰ ভিতৰত থকা পাঁচখন আশ্ৰয় শিবিৰ পৰিদৰ্শন কৰি সন্ধিয়া গুৱাহাটীলৈ উভতি যায়।

ইফালে, বৰাক নৈৰ বাঢ়নী পানীত ডুব গৈ শিলচৰ-শ্ৰীভূমি সংযোগী ৬ নম্বৰ ৰাষ্ট্ৰীয় ঘাইপথ সম্পূর্ণৰূপে বন্ধ হৈ পৰিছে। শালচাপৰা অঞ্চলৰ ওচৰত পানী ৰাস্তাৰ ওপৰেৰে বাগৰি যোৱাত পথচাৰী আৰু যান-বাহন চলাচলত জটিলতা সৃষ্টি হৈছে। ফলত শিলচৰ আৰু শ্ৰীভূমিৰ মাজৰ যোগাযোগ সম্পূর্ণ বিচ্ছিন্ন হৈ পৰিছে। যদিও বহু যান-বাহনে বিপদসংকুলভাৱে পানীৰ মাজেৰে চলাচল অব্যাহত ৰাখিছে, তাতেও যিকোনো সময়ত দুৰ্ঘটনা সংঘটিত হোৱাৰ আশংকা দেখা দিছে।

বানাক্ৰান্ত ৰাইজ বৰ্তমান আশ্ৰয় শিৱিৰত আশ্ৰয় লৈ আছে যদিও, তেওঁলোকে প্ৰয়োজনীয় সা-সুবিধা নাপোৱাৰ অভিযোগ তুলিছে। বহু লোকৰ আক্ষেপ, ঘৰ-দুৱাৰ হেৰুৱাই এতিয়া আশ্ৰয় লোৱা তেওঁলোকক চৰকাৰে এখন তিৰ্পাল বা এটুকুৰা কাপোৰো নিদিয়ে।

এই ভয়ংকৰ বান পৰিস্থিতিৰ মাজতে বৰাক উপত্যকাৰ বিভিন্ন ঠাইত ভূমিস্খলনে ভয়ংকৰ ৰূপ লোৱা দেখা গৈছে। মঙলবাৰে পুৱা শিলচৰ-ডিমা হাচাও সীমান্তৱৰ্তী বান্দৰখলত ভূমিস্খলনৰ ফলত শিলচৰ-হাফলং ৰাষ্ট্ৰীয় ঘাইপথ সম্পূর্ণৰূপে বন্ধ হৈ পৰিছে। উল্লেখযোগ্য যে, এই পথই আছিল শিলচৰৰ পৰা গুৱাহাটীলৈ যাত্ৰা কৰাৰ একমাত্ৰ বিকল্প। ইতিমধ্যে বন্ধ হৈ থকা শিলচৰ-মেঘালয় পথৰ পাছত এই পথটোৰ বন্ধ হৈ পৰাৰ খবৰে অঞ্চলটোত অধিক সংকটৰ সৃষ্টি কৰিছে।

ইতিমধ্যে, এই ভয়ংকৰ বান পৰিস্থিতিৰ প্ৰভাৱ পৰিছে অঞ্চলটোৰ শিক্ষা খণ্ডতো। বৰ্তমান ৰাজ্যৰ ২২খন জিলাৰ ১,২৫০খন বিদ্যালয় বানত বুৰ গৈ আছে। ইয়াৰ মাজতে হাইলাকান্দি জিলা প্ৰশাসনে অহা ৫ জুনলৈ সকলো বিদ্যালয় বন্ধ ঘোষণা কৰিছে। ছাত্র-ছাত্ৰী আৰু শিক্ষক-শিক্ষয়িত্ৰীৰ সুৰক্ষাৰ কথা বিবেচনা কৰি এই সিদ্ধান্ত গ্ৰহণ কৰা হৈছে।