মহিলা ভোটাৰক আকৰ্ষিত কৰিবলৈ এতিয়াৰ পৰাই নতুন আঁচনি ঘোষণা কৰিবলৈ আৰম্ভ কৰিছে অসম প্ৰদেশ কংগ্ৰেছৰ সভাপতি ভূপেন বৰাই৷ বৰ্তমানৰ শাসক পক্ষ বিজেপিক প্ৰত্যাহ্বান জনাই মহিলাৰ বাবে কংগ্ৰেছ শাসনলৈ আহিলে মহিলাসকলৰ বাবে আনিব বিশেষ আঁচনি৷ আজি মুখ্যমন্ত্ৰী ড০ হিমন্ত বিশ্ব শৰ্মাই ৰাজ্য চৰকাৰৰ অভিলাষী আঁচনি অৰুণোদয় ৩.০ আনুষ্ঠানিকভাবে শুভাৰম্ভ কৰাৰ দিনটোতে প্ৰদেশ কংগ্ৰেছৰ সভাপতি ভূপেন বৰাই কংগ্ৰেছ চৰকাৰ আহিলে মহিলাক মাহেকত কিমানকৈ টকা দিব সেই কথা স্পষ্ট কৰে৷ ইমানে নহয় আঁচনিখনৰ নাম কি হ’ব সেয়াও ঘোষণা কৰে৷ আজি সাংবাদিকৰে মুখামুখি হৈ ভূপেন বৰাই প্ৰথমে ২০২৬ত অসমত বিৰোধী কংগ্ৰেছৰ চৰকাৰ আহিলে অৰুণোদয় আঁচনি বাতিল কৰাৰ ঘোষণা কৰে৷ মুখ্যমন্ত্ৰী হিমন্ত বিশ্ব শৰ্মাই অৰুণোদয় ৩.০ৰ শুভাৰম্ভণি পাছতেই অৰুণোদয় আঁচনি বাতিল কৰাৰ ঘোষণা কৰি প্ৰদেশ কংগ্ৰেছৰ সভাপতি ভূপেন বৰাই কয় যে অৰুণোদয় দিয়াৰ বাবে আমি বেয়া পোৱা নাই। কিন্তু আমাৰ ৰাজ্যত এতিয়া ১২,৬০০ চাকৰিৰ বিপৰীতে ৩২ লাখে আবেদন কৰে ৷ ১২,৬০০ নিবনুৱাই চাকৰি পাব৷ কিন্তু বাকীবোৰৰ কি হ’ব? মুখ্যমন্ত্ৰীয়ে এই কথা ভাবিছেনে? আমি সেইসকলোৰে কথা ভাবিছো বুলি কৈ ভূপেন বৰাই কয় যে ২০২৬ত আমাৰ চৰকাৰ আহিব তেতিয়া অৰুণোদয় আঁচনি বন্ধ কৰি ন-লখিমী আঁচনি আহিব৷ মুখ্যমন্ত্ৰীয়ে বাচি বাচি বিজেপিৰ সদস্যকহে অৰুণোদয় দিছে৷ আমি জাতি-বৰ্ণ-ধৰ্ম আৰু ভাষা নিৰ্বিশেষে ন-লখিমীৰ ধন দিম। কংগ্ৰেছ চৰকাৰে প্ৰতি মাহৰ ৯ তাৰিখে ভাষা-জাতি-ধৰ্ম নিৰ্বিশেষে হিতাধিকাৰীক ৩০০০ টকাকৈ দিম৷ ইপিনে বিজেপিৰ সভালৈ আজিকালি মানুহ নাহে বুলি কটাক্ষ কৰি ভূপেন বৰাই কয় যে বিজেপিৰ মন্ত্ৰী-বিধায়ক মিটিঙলৈ গ’লে মানুহ নাহে৷ সেয়ে চৰকাৰী আঁচনিৰ ফৰ্ম দিম বিজেপিয়ে সভালৈ মানুহ আনিবলগীয়া হৈছে৷