পঞ্চায়ত নিৰ্বাচনত ধনৰ বিনিময়ত কংগ্ৰেছৰ টিকট বিতৰণৰ অভিযোগৰ তদন্তৰ বাবে অসম প্ৰদেশ কংগ্ৰেছে এটা ত্ৰি-সদস্যীয়া তদন্ত সমিতি গঠন কৰিছে। অসম কংগ্ৰেছৰ সভাপতি ভূপেন কুমাৰ বৰাৰ ঘোষণামৰ্মে প্ৰাক্তন কেন্দ্ৰীয় মন্ত্ৰী পৱন সিং ঘাটোৱাৰৰ নেতৃত্বত এই সমিতিয়ে অভিযোগসমূহৰ সত্যতা পৰীক্ষা কৰিব।

তদন্ত সমিতিৰ অধ্যক্ষ হিচাপে থাকিব পৱন সিং ঘাটোৱাৰ, আন দুগৰাকী সদস্য হ’ল ৰ পি শৰ্মা আৰু ববিতা শৰ্মা। দলৰ তত্ত্বাৱধায়ক জীতেন্দ্ৰ সিঙৰ নিৰ্দেশমৰ্মে গঠিত এই সমিতিয়ে ধন লোৱা-দিয়া, মনোনয়ন প্ৰত্যাহাৰ, দলবিৰোধী কাৰ্য্যকলাপ আদি সকলো অভিযোগৰ তীক্ষ্ণভাৱে তদন্ত কৰিব।

সমিতিয়ে ৭ মে’ৰ ভিতৰত অভিযোগকাৰীসকলৰ পৰা প্ৰমাণ সংগ্ৰহ কৰিব আৰু প্ৰতিবেদন ভূপেন বৰা আৰু জীতেন্দ্ৰ সিঙক অৰ্পণ  কৰিব। ভূপেন বৰাই স্পষ্ট কৰিছে যে, যদি প্ৰমাণ পোৱা যায়, তেন্তে দ্ৰুত কাৰ্য্যব্যৱস্থা লোৱা হ’ব। বিশেষকৈ বৰপেটা, ধুবুৰী, গোৱালপাৰা, বঙাইগাঁও জিলাত টকাৰ বিনিময়ত টিকট দিয়াৰ অভিযোগ ৰাজহুৱা হোৱাৰ পিছতেই এই তদন্তৰ সিদ্ধান্ত লোৱা হৈছে।