ডিজিটেল ডেস্কঃ  বেল বৰণেৰে ষষ্ঠীৰ বেদীত প্ৰতিষ্ঠা কৰা দেৱীক বিজয়া দশমীত বিসৰ্জন দিয়া হয় । সেই অনুসৰি ৰাজ্যৰ বিভিন্ন প্ৰান্তত শনিবাৰৰ পৰা আৰম্ভ হৈছে বিসৰ্জন প্ৰক্ৰিয়া । কিছুমান স্থানত শনিবাৰে প্ৰতিমাসমূহ বিসৰ্জন দিয়া হৈছে যদিও দেওবাৰেও এই প্ৰক্ৰিয়া চলি থাকিব । গুৱাহাটী মহানগৰীৰো ৩ টা স্থানত প্ৰশাসনে বিসৰ্জনৰ ব্যৱস্থা কৰিছে ।

ইয়াৰ ভিতৰত অন্যতম নুনমাটি-উজানবজাৰ সংযোগী পথৰ সমীপৰ ব্ৰহ্মপুত্ৰ নদীৰ চূণচালি জয়পুৰ ঘাট । য’ত শনিবাৰে পুৱা ১০ বজাৰ পৰা নিশালৈ পূজা কমিটীসমূহে তেওঁলোকৰ প্ৰতিমা বিসৰ্জন দিয়ে । শনিবাৰৰ দিনটোত প্ৰায় ১৭ খন পূজা কমিটীয়ে দুৰ্গা দেৱীৰ প্ৰতিমা বিসৰ্জন দিছে । ইফালে দেওবাৰেও বিসৰ্জন প্ৰক্ৰিয়া অব্যাহত থাকিব বুলি প্ৰশাসনে জনাইছে ।

প্ৰতিমা বিসৰ্জনৰ প্ৰতি লক্ষ্য ৰাখি প্ৰশাসনে কঠোৰ সুৰক্ষা ব্যৱস্থা গ্ৰহণ কৰিছে । জয়পুৰ ঘাটত পৰ্যাপ্ত আৰক্ষী, নদী আৰক্ষী বাহিনী মোতায়েন কৰাৰ লগতে নুনমাটি কেন্দ্ৰীয় নাগৰিক সমিতিয়েও স্বেচ্ছাসেৱকৰ ব্যৱস্থা কৰিছে । প্ৰায় ১০০ মিটাৰ দূৰৈৰ পৰাই বিসৰ্জনৰ বাবে অনা প্ৰতিমাসমূহ কমিটীৰ পৰা স্বেচ্ছাসেৱকসকলে গ্ৰহণ কৰিছে ।

তাৰ পাচত দুৰ্গা পূজা কমিটীৰ ১০ৰ পৰা ১৫ জন কৰ্মকৰ্তাৰ উপস্থিতিত প্ৰতিমাসমূহ বিসৰ্জন দিয়াৰ বাবে ব্যৱস্থা কৰা হৈছে । বিসৰ্জনৰ সময়ত যাতে ঘাটত কোনো ধৰণৰ বিশৃংখল পৰিস্থিতিৰ সৃষ্টি নহয় তাৰ প্ৰতি লক্ষ্য ৰাখিও কামৰূপ মহানগৰ জিলা প্ৰশাসনে অধিক সতৰ্কতা অৱলম্বন কৰিছে । শনিবাৰে এই বিসৰ্জন কাৰ্যসূচীত প্ৰশাসনৰ কেইবাগৰাকী শীৰ্ষ বিষয়া উপস্থিত থাকি সমগ্ৰ প্ৰক্ৰিয়াটো পৰ্যবেক্ষণ কৰে