ভাৰতত অব্যাহত আছে যাত্ৰীবাহী বিমানলৈ ভাবুকি প্ৰদানৰ ঘটনা ৷ দেওবাৰে দেশৰ প্ৰায় ৫০খন বিমানলৈ বোমাৰ ভাবুকি আহে ৷ ইয়াৰে দুখন বিমান গন্তব্যস্থানৰ বিপৰীতে আন ঠাইলৈ ঘূৰাই পঠোৱা হয় ৷ প্ৰাপ্ত তথ্য অনুসৰি দুসপ্তাহত কমেও ৩৫০ খন বিমানলৈ এইদৰে বোমাৰ ভাবুকি আহিছে ৷ সামাজিক মাধ্যমৰ যোগেদি এই ভাবুকিসমূহ প্ৰদান কৰি থকা হৈছে ৷

বেংগালুৰুৰ পৰা অযোধ্যালৈ অহা আকাছা এয়াৰলাইন্সৰ বিমানখনে বোমা বিস্ফোৰণৰ ভাবুকি পোৱাৰ পাছতে কৰ্তৃপক্ষ সতৰ্ক হয়। লগতে বেংগালুৰুৰ পৰা গোৰখপুৰলৈ অহা আন এখন বিমানলৈও বোমা বিস্ফোৰণৰ ভাবুকি অহাৰ পাছত আতংকৰ সৃষ্টি হয়।

বেংগালুৰুৰ পৰা অযোধ্যালৈ অহা বিমানত বোমা বিস্ফোৰণৰ তথ্য লাভ কৰাৰ লগে লগে আৰক্ষীৰ শীৰ্ষ বিষয়াসকলে মহৰ্ষি বাল্মীকি আন্তঃৰাষ্ট্ৰীয় বিমানবন্দৰত উপস্থিত হয় । জৰুৰীকালীন অৱস্থাৰ সৈতে মোকাবিলা কৰিবলৈ সংশ্লিষ্ট সকলো বিভাগক সতৰ্ক কৰি দিয়া হয় । বিমানখনে অৱতৰণ কৰাৰ পাছতে বোমা নিষ্কাশন দলটোৱে তদন্ত আৰম্ভ কৰে । যাত্ৰীসকলকো পৰীক্ষা কৰা হয় । বৰ্তমান সময়ত কোনো ধৰণৰ ভাবুকিৰ সন্ধান পোৱা নাই । অৱশ্যে তদন্ত অব্যাহত আছে ।

আকাছা এয়াৰৰ প্ৰায় ১৫ খন বিমানে নিৰাপত্তা সতৰ্কবাণীৰ সন্মুখীন হোৱাত সকলো বিমানৰে পৰীক্ষা চলোৱা হয় ৷ তাৰ পাছত অভিযানৰ বাবে মুকলি কৰি দিয়া হয় । সূত্ৰ অনুসৰি ইণ্ডিগ’ই ১৮ খন বিমানৰ আৰু ভিষ্টাৰাই ১৭ খন বিমানৰ প্ৰতি ভাবুকি লাভ কৰিছিল ।