আলফা(স্বা)ৰ ভাবুকিৰ পাছতেই দিছপুৰ থানাত দাখিল কৰা এজাহাৰ প্ৰত্যাহাৰ কৰে গৌৰৱ চোমানিয়ে। দিছপুৰ থানাত দাখিল কৰা এজাহাৰখন মঙলবাৰে প্ৰত্যাহাৰ কৰে চোমানিয়ে।

গৌৰৱ চোমানি নামৰ প্ৰাক্তন কংগ্ৰেছ নেতা তথা ন-বিজেপি কৰ্মীগৰাকীয়ে বীৰ লাচিত সেনাৰ নেতা শৃংখল চলিহাৰ বিৰুদ্ধে দাখিল কৰিছিল এজাহাৰ। শিৱসাগৰত ৰাষ্ট্ৰীয় পৰ্যায়ৰ এগৰাকী পাঞ্জা খেলুৱৈক কেইজনমান অনাঅসমীয়া ব্যক্তিয়ে প্ৰহাৰ কৰা পাছতেই শিৱসাগৰৰ ৩০ৰো অধিক দল-সংগঠন আৰু স্থানীয় ৰাইজে প্ৰতিবাদ সাব্যস্ত কৰিছিল। এই প্ৰতিবাদতেই নিজস্ব শৈলীৰে অনাঅসমীয়া লোকক সকীয়নি প্ৰদান কৰিছিল শৃংখল চলিহাই। যাৰ বাবে দিছপুৰ থানাত এজাহাৰ দাখিল কৰিছিল গৌৰৱ চোমানিয়ে।

কিন্তু গৌৰৱ চোমানিৰ এই এজাহাৰৰ ভিত্তিত শৃংখল চলিহা গ্ৰেপ্তাৰ হলে ইয়াৰ বিষম পৰিস্থিতিৰ সৃষ্টি হব বুলি ভাবুকি প্ৰদান কৰিছিল আলফা(স্বা)এ। আলফাৰ এই ভাবুকিৰ পাছতেই গৌৰৱ চোমানিক সশস্ত্ৰ নিৰাপত্তাৰক্ষী প্ৰদান কৰা হৈছিল যদিও মঙলবাৰে তেওঁ দিছপুৰ থানাত প্ৰদান কৰা গোচৰ প্ৰত্যাহাৰ কৰে।

গৌৰৱ চোমানিয়ে এজাহাৰ প্ৰত্যাহাৰ কৰিলেও বিপদ কমা নাই শৃংখল চলিহাৰ। দিছপুৰ থানাত দাখিল কৰা এজাহাৰ গৌৰৱ চোমানিয়ে উঠাই লৈছে যদিও ভৰলুমুখ থানাত শংকৰ সিং নামৰ আন এজন ব্যক্তিয়ে দাখিল কৰিছে এজাহাৰ।

 

লগতে পঢ়কঃ শৃংখলৰ বিৰুদ্ধে এজাহাৰ দি সশস্ত্ৰ নিৰাপত্তাৰক্ষী পালে ন-বিজেপি গৌৰৱ চোমানিয়ে