জম্মু-কাশ্মীৰৰ শ্ৰীনগৰত দেওবাৰে সন্ত্ৰাসবাদী আক্ৰমনৰ ঘটনা সংঘটিত হয়। সন্ত্ৰাসবাদীৰ টি আৰ চি আৰু দেওবৰীয়া বজাৰত গ্ৰেনেড নিক্ষেপ কৰে। এই ঘটনাত ১০ জনতকৈ অধিক লোক আহত হোৱা বুলি জানিব পৰা গৈছে । প্ৰাপ্ত তথ্য অনুসৰি, সাপ্তাহিক বজাৰৰ বাবে অঞ্চলটোত বজাৰ কৰা লোকৰ বিপুল ভিৰ হয় আৰু সন্ত্ৰাসবাদীয়ে ইয়াৰে সুযোগ লৈ এই বিস্ফোৰণ সংঘটিত কৰাৰ সন্দেহ কৰে।

গ্ৰেনেড বিস্ফোৰণৰ পিছতে অঞ্চলটোত বিশৃংখলতাৰ সৃষ্টি হয় । সূত্ৰই জনোৱা মতে, পৰ্যটন অভ্যৰ্থনা কেন্দ্ৰৰ খেলপথাৰৰ বাহিৰত গ্ৰেনেড নিক্ষেপ কৰাত কমেও ১২ জন সাধাৰণ নাগৰিক আহত হয় । আহতসকলক চিকিৎসাৰ বাবে শ্ৰীনগৰৰ SMHS হাস্পতাললৈ যোৱা হৈছে। সম্প্ৰতি ঘটনাস্থলীলৈ অতিৰিক্ত বাহিনী প্ৰেৰণ কৰাৰ লগতে অঞ্চলটো ঘেৰাও কৰা হৈছে । ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে।

উল্লেখ্য যে, মাত্ৰ এদিন পূৰ্বে শনিবাৰে শ্ৰীনগৰৰ খনিয়াৰত নিৰাপত্তা বাহিনী আৰু সন্ত্ৰাসবাদীৰ মাজত সংঘৰ্ষ হৈছিল। এই ঘটনাত এজন সন্ত্ৰাসবাদী নিহত হৈছিল।