নিশাৰ গুৱাহাটী মহানগৰীত পুনৰ এক ভয়ংকৰ পথ দুৰ্ঘটনা সংঘটিত হৈছে। কিছু সময়ৰ পূৰ্বে মহানগৰীৰ জুৰোডৰ শ্ৰদ্ধাঞ্জলি উৰণ সেতুৰ ওপৰত এই দুৰ্ঘটনা সংঘটিত হৈছে।

এখন চাৰিচকীয়া বাহন আৰু এখন মটৰ চাইকেলৰ মাজত প্ৰচণ্ড খুন্দাৰ ফলতে এই দুৰ্ঘটনা সংঘটিত হয়। প্ৰত্যক্ষদৰ্শীৰ মতে গীতানগৰৰ পৰা গণেশগুৰি অভিমুখে আহিছিল দুৰ্ঘটনাত পতিত হোৱা ৱেগনৰ বাহখন।

সেই সময়তে মটৰ চাইকেলখনৰ সৈতে মুখামুখী সংঘৰ্ষ হয়। দুৰ্ঘটনাত অতি বেয়াকৈ আঘাতপ্ৰাপ্ত হৈছে মটৰ চাইকেল আৰোহীগৰাকী। তেওঁক অতি সংকটজনক অৱস্থাত জি এম চি এইছত ভৰ্তি কৰোৱা হৈছে।

অৱশ্যে ৱেগনৰ বাহনখনত থকা যাত্ৰী দুগৰাকী কোনো মতে ৰক্ষা পৰিছে। ঘটনাৰ পাছতে গীতানগৰ আৰক্ষী আহি দুৰ্ঘটনাস্থলীত উপস্থিত হয় আৰু পৰিস্থিতিত চম্ভালি লয়।

এই দুৰ্ঘটনা ইমানেই ভয়ংকৰ আছিল যে ৱেগনৰ বাহনখনৰ সন্মুখ ভাগ সম্পূৰ্ণৰূপে বিধ্বস্ত হয়। দুৰ্ঘটনাগ্ৰস্ত ৱেগনৰ বাহখনৰ নম্বৰ এ এছ ২১ এইছ ০১৪০ আৰু মটৰ চাইকেল খনৰ নম্বৰ এ এছ ০১ বি কে ৬৮৫৯।  অৱশ্যে এতিয়ালৈকে আহত মটৰ চাইকেল আৰোহীজনৰ পৰিচয় লাভ কৰা নাই।