গুৱাহাটীঃ শিক্ষা ব্যৱস্থাত ৰাজনীতিৰ অনুপ্ৰৱেশক লৈ ব্যাপক চৰ্চা চলি অহাৰ সময়তে শেহতীয়াকৈ গুৱাহাটী বিশ্ববিদ্যালয়ৰ নতুন উপাচাৰ্য হিচাপে নিযুক্তি দিয়া হয় মুখ্যমন্ত্ৰী হিমন্ত বিশ্ব শৰ্মাৰ ঘনিষ্ঠ হিচাপে পৰিচিত ননী গোপাল মহন্তক। বিশ্ববিদ্যালয়খনৰ বৰ্তমানৰ উপাচাৰ্য প্ৰতাপজ্যোতি সন্দিকৈৰ কাৰ্যকালৰ অন্ত পৰিবলৈ আৰু ২৫ দিন বাকী থকা সময়তে ৰাজ্যপালে ননী গোপাল মহন্তক এই গুৰুত্বপূৰ্ণ পদত স্থলাভিষেক কৰোৱাকলৈও বহুজনে প্ৰতিক্ৰিয়া ব্যক্ত কৰিছে।

বৰ্ত্তমানৰ উপাচাৰ্য প্ৰতাপজ্যোতি সন্দিকৈয়েও ছচিয়েল মিডিয়াযোগে পোষ্ট কৰি এই সন্ধর্ভত মত প্ৰকাশ কৰা দেখা গৈছে। সন্দিকৈয়ে তেওঁৰ ফেচবুক পোষ্টত লিখিছে- “২০১৯ চনৰ ২১ আগষ্টত গুৱাহাটী বিশ্ববিদ্যালয়ৰ উপাচাৰ্যৰ দায়িত্ব লৈছিলো। মোৰ জীৱনৰ সমগ্ৰ সাধনাৰ প্ৰাপ্তি আছিল এই দায়িত্ব। মোৰ কাৰ্যকাল শেষ হবলৈ ২৫ দিন বাকী থাকোতেই ৰাজ্যপালে নতুন উপাচাৰ্য নিযুক্তি দি নিজেও নতুন চাকৰিত যোগদান কৰিলেগৈ। মই আতঁৰি যাবলৈ সাজু হৈছো। জীৱনে মোক নিৰ্মোহ হবলৈ শিকাইছে। মনৰ মাজত নিসংগ অহং। গুৱাহাটী বিশ্ববিদ্যালয় উজলি থাকক সৰ্বকাল।”

উল্লেখ্য যে, গুৱাহাটী বিশ্ববিদ্যালয়ৰ ৰাজনীতি বিজ্ঞান বিভাগৰ অধ্যাপক তথা মুৰব্বী হিচাপে কাৰ্যনিৰ্বাহ কৰা ডঃ ননী গোপাল মহন্তক ২০২১ চনত অসম চৰকাৰৰ শিক্ষা বিভাগৰ উপদেষ্টা হিচাপে নিযুক্তি দিয়া হৈছিল। মুখ্যমন্ত্ৰীৰ ঘনিষ্ঠ হিচাপে পৰিচিত মহন্তই শেহতীয়াকৈ এই পদৰ পৰা পদত্যাগ কৰাৰ পিছতে তেওঁক বিশ্ববিদ্যালয়ৰ উপাচাৰ্য হিচাপে নিযুক্তি প্ৰদানৰ চৰ্চা আৰম্ভ হৈছিল।