মঙলবাৰে উত্তৰ-পূৰ্বাঞ্চলৰ উন্নয়ন বিভাগৰ কেন্দ্ৰীয় মন্ত্ৰী জ্যোতিৰাদিত্য এম. সিন্ধিয়াক সাক্ষাৎ কৰে ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই। সিন্ধিয়াৰ চৰকাৰী বাসগৃহত প্ৰায় ৩০ মিনিট ধৰি চলা কথোপকথনত মুখ্যমন্ত্ৰী শৰ্মাই কেন্দ্ৰীয় মন্ত্ৰীগৰাকীক অহা বছৰৰ ফেব্ৰুৱাৰীত গুৱাহাটীত অনুষ্ঠিত হ’বলগীয়া এডভান্টেজ অসম সন্মিলনত অংশগ্ৰহণৰ বাবে আমন্ত্ৰণ জনায়।

সমগ্ৰ উত্তৰ-পূব অঞ্চলক অন্য এক মাত্ৰা প্ৰদান কৰিব পৰা দিল্লীত অনুষ্ঠিত আগন্তুক অষ্টলক্ষ্মী মহোৎসৱৰ আয়োজন কৰাৰ বাবে কেন্দ্ৰীয় মন্ত্ৰী সিন্ধিয়াক প্ৰশংসা কৰে মুখ্যমন্ত্ৰীয়ে। লগতে আগন্তুক অনুষ্ঠান আৰু অসমত চলি থকা উন্নয়নমূলক প্ৰকল্প সন্দৰ্ভতো বিতংভাৱে আলোচনা কৰে।

এই সন্দৰ্ভত মুখ্যমন্ত্ৰী ড০ শৰ্মাই নিজ এক্স হেণ্ডেলৰ জৰিয়তে লিখিছে যে, “আজি পুৱা মাননীয় কেন্দ্ৰীয় মন্ত্ৰী জ্যোতিৰাদিত্য সিন্ধিয়া জীক ২০২৫ চনৰ ফেব্ৰুৱাৰী মাহত গুৱাহাটীত অনুষ্ঠিত হ’বলগীয়া #AdvantageAssam সন্মিলনলৈ আমন্ত্ৰণ জনাবলৈ পাই সুখী হৈছো।” লগতে ড’নাৰ মন্ত্ৰণালয়ৰ দ্বাৰা পৰিচালিত আগন্তুক অষ্টলক্ষ্মী মহোৎসৱ আৰু ৰাজ্যখনত চলি থকা উন্নয়ন প্ৰকল্পৰ বিষয়েও আমি আলোচনা কৰিলোঁ।”