১৫ ছেপ্টেম্বৰত অনুষ্ঠিত হ’বলগীয়া অসম চৰকাৰৰ তৃতীয় বৰ্গৰ নিযুক্তি পৰীক্ষা দিবলৈ গ’লে পৰীক্ষাৰ্থীসকলে মানিব লাগিব বহুকেইটা নিয়ম।

৩য়, ৪ৰ্থ বৰ্গৰ পৰীক্ষাৰ্থীসকলে পৰীক্ষা কেন্দ্ৰত মানি চলিব লাগিব কেইবাটাও নিয়ম। নিয়ম নামানিলে কঠোৰ শাস্তি ভুগিবলগীয়া হ’ব পাৰে আপুনি।

পৰীক্ষা দিবলৈ যাওঁতে আধাৰ, পানকাৰ্ড, ড্ৰাইভিং লাইচেন্সকে ধৰি যিকোনো এবিধ ফটো পৰিচয়পত্ৰ লৈ যাব লাগিব। কেৱল এডমিট কাৰ্ড থকা পৰীক্ষাৰ্থীকহে পৰীক্ষাকেন্দ্ৰত প্ৰৱেশ কৰিবলৈ অনুমতি দিয়া হ’ব।

OMR শ্বীটত শুদ্ধ উত্তৰ দিওঁতে সাৱধান হ’ব লাগিব আপুনি। এইবাৰ পৰীক্ষাত নিগেটিভ মাৰ্কিঙৰ ব্যৱস্থা থাকিব। ভুল উত্তৰ নিৰ্বাচন কৰিলে কৰ্তন কৰা হ’ব আপোনাৰ নম্বৰ। চাৰিটা প্ৰশ্নৰ ভুল উত্তৰ দিলেই কৰ্তন কৰা হ’ব ১ নম্বৰ।

আনহাতে এটা প্ৰশ্নৰ বাবে এটাতকৈ অধিক বিকল্প চিহ্নিত কৰিলে নিগেটিভ মাৰ্কিং লাভ কৰিব প্ৰাৰ্থীসকলে। তদুপৰি OMR শ্বীটত নিৰ্ধাৰিত স্থানতে প্ৰাৰ্থীসকলে ৰাফ ৱৰ্ক কৰিব পাৰিব। OMR শ্বীটত ৰাফ ৱৰ্ক বা ওপৰা-উপৰিকৈ লিখা বা হোৱাইটনাৰ ব্যৱহাৰ কৰিলে OMR শ্বীট মূল্যায়ন কৰা নহ’ব।

পৰীক্ষাৰ অন্তত প্ৰাৰ্থীসকলে OMR উত্তৰবহী, প্ৰশ্ন বুকলেট পৰীক্ষকৰ হাতত জমা দিব লাগিব। প্ৰাৰ্থীসকলে উত্তৰবহী জমা দিয়াৰ অন্তত ফৰ্ম নং ৮ত স্বাক্ষৰ কৰিব লাগিব। স্বাক্ষৰ নকৰিলে প্ৰাৰ্থীজনক অনুপস্থিত বুলি দেখুওৱা হ’ব।

ইফালে পৰীক্ষাত অসৎ উপায় অৱলম্বন কৰিলে ৩ বছৰ পৰ্যন্ত কাৰাবাস খাটিবলগীয়া হ’ব পাৰে। পৰীক্ষাকেন্দ্ৰৰ এশ মিটাৰ ব্যসাৰ্ধত সাধাৰণ জনতাৰ প্ৰৱেশত নিষেধাজ্ঞা আৰোপ। পৰীক্ষাৰ দায়িত্বত নিয়োজিত কৰ্মচাৰীকহে প্ৰৱেশৰ অনুমতি প্ৰদান কৰা হ’ব।

ইয়াৰ উপৰি পৰীক্ষাকেন্দ্ৰসমূহ চিচি টিভিৰ আওতাত ৰখাৰ উপৰি ভিডিঅ’গ্ৰাফীৰো ব্যৱস্থা কৰা হৈছে। পৰীক্ষাৰ্থীসকলে মোবাইলকে ধৰি কোনো ইলেক্ট্ৰ’নিক ডিভাইচ লগত লৈ যাব নোৱাৰিব। পৰীক্ষা কেন্দ্ৰৰ আশে পাশে জিলা প্ৰশাসনে জাৰি কৰিছে ১৬৩ ধাৰা।