ডিজিটেল ডেস্কঃ ক্ষমতাৰ অপব্যৱহাৰ কৰি এগৰাকী ন্যায়াধীশক ভয়-ভাবুকি প্ৰদান কৰাৰ অভিযোগত আদালতে চমন জাৰি কৰিছে জম্মু – কাশ্মীৰৰ গণ্ডাৰবল জিলাৰ উপায়ুক্ত শ্যাম বীৰ সিঙক। জম্মু – কাশ্মীৰ উচ্চ ন্যায়ালয়ে উপায়ুক্ত গৰাকীৰ বিৰুদ্ধে অপৰাধমূলক অৱমাননাৰ গোচৰ ৰুজু কৰি ৫ আগষ্টত ব্যক্তিগতভাৱে আদালতত হাজিৰ হৈ উত্তৰ দিবলৈ নিৰ্দেশ দিছে। উচ্চ ন্যায়ালয়ে আদালতৰ কাৰ্য্যবিধিত সহায়ৰ বাবে জ্যেষ্ঠ অধিবক্তা ৰিয়াজ আহমেদ জানক এমিকাছ কুৰিয়া হিচাপেও নিযুক্তি দিয়ে।
উল্লেখ্য যে, ২০২২ চনৰ পৰা গাণ্ডাৰবলৰ উপায়ুক্ত হিচাপে কাৰ্যনিৰ্বাহ কৰি থকা ২০১৮ চনৰ বেচৰ ভাৰতীয় প্ৰশাসনিক সেৱাৰ বিষয়া শ্যাম বীৰ সিঙে গাণ্ডাৰবলৰ উপ- ন্যায়াধীশ ফৈয়াজ আহমেদ কুৰেশ্বীক নিজৰ ক্ষমতাৰ অপব্যৱহাৰ কৰি ভয় – ভাবুকি প্ৰদান আৰু হাৰাশাস্তি কৰাৰ অভিযোগ উত্থাপন হৈছিল।
২০২২ চনৰ অক্টোবৰত চৰকাৰী সিদ্ধান্ত মানি নচলাৰ বাবে ন্যায়াধীশ কুৰেশ্বীয়ে আই এ এছ সিঙৰ দৰমহা বন্ধ কৰাৰ নিৰ্দেশ দিছিল। উপ ন্যায়াধীশগৰাকীৰ মতে, উপায়ুক্তগৰাকীয়ে ইয়াৰ পিছতে তেওঁৰ পদৰ অপব্যৱহাৰ কৰি তেওঁক হাৰাশাস্তি কৰিবলৈ আৰম্ভ কৰে।
এই সন্দৰ্ভত শ্যাম বীৰ সিঙৰ বিৰুদ্ধে ৰুজু কৰা গোচৰত আজি উচ্চ ন্যায়ালয়ে চমন জাৰি কৰি আদালতৰ চমন অৱজ্ঞা কৰিলে কঠোৰ আইনী পদক্ষেপ লোৱা হব বুলিও সকিয়াই দিয়ে।