দেশজুৰি তীব্ৰ বিতৰ্কৰ সৃষ্টি হোৱা তিৰুপতি মন্দিৰৰ লাড়ু প্ৰস্তুত কৰোতে ব্যৱহৃত ঘিউত জন্তুৰ চৰ্বি মিশ্ৰণৰ অভিযোগৰ শুনানি গ্ৰহণ কৰি অন্ধ্ৰ প্ৰদেশৰ মুখ্যমন্ত্ৰী চন্দ্ৰবাবু নাইডুৰ বক্তব্যক লৈ উচ্চতম ন্যায়ালয়ে প্ৰশ্ন উত্থাপন কৰি কয় যে ঈশ্বৰক ৰাজনীতিৰ পৰা আঁতৰাই ৰাখিব লাগে।

উচ্চতম ন্যায়ালয়ে ৰাজহুৱা কৰা প্ৰতিবেদন জুলাই মাহৰ বুলি উল্লেখ কৰে যদিও ছেপ্টেম্বৰ মাহত এই সন্দৰ্ভত মুখ্যমন্ত্ৰীয়ে বিবৃতি দি আছে। প্ৰসাদম গোচৰৰ তদন্ত কেৱল ৰাজ্য চৰকাৰে গঠন কৰা এছ আই টিয়ে কৰিব বা তদন্ত আন কোনো সংস্থাৰ হাতত অৰ্পণ কৰা হ’বনে সেই সন্দৰ্ভত ৩ অক্টোবৰত উচ্চতম ন্যায়ালয়ে নিজৰ নিৰ্দেশ দিব পাৰে।

উচ্চতম ন্যায়ালয়ে ছলিচিটৰ জেনেৰেল তুষাৰ মেহতাক প্ৰশ্ন কৰিছে যে ৰাজ্য চৰকাৰৰ এছ আই টি যথেষ্ট নে কোনো স্বতন্ত্ৰ সংস্থাই নতুনকৈ তদন্ত কৰিব লাগে।

শুনানিৰ সময়ত আদালতে কয় যে এই প্ৰতিবেদনত প্ৰসাদত জন্তুৰ চৰ্বি মিশ্ৰিত ঘিউৰ লাড়ু ব্যৱহাৰ কৰা হৈছিল নে নাই সেয়া স্পষ্ট হোৱা নাই। আদালতে মন্দিৰ প্ৰশাসনক প্ৰশ্ন কৰে যে যি নমুনাত মিশ্ৰণ পোৱা গৈছে সেই নমুনা প্ৰসাদম নিৰ্মাণত ব্যৱহাৰ কৰা হৈছে নেকি?

ইয়াৰ পাছত মন্দিৰ প্ৰশাসনৰ অধিবক্তাই কয় যে ইয়াৰ তদন্ত কৰিব লাগিব। এই সন্দৰ্ভত আদালতে কয় যে তদন্ত চলি থকাৰ সময়তে প্ৰসাদম লাড়ু বনোৱাত মিশ্ৰিত ঘিউ ব্যৱহাৰ কৰা বুলি প্ৰমাণ ক’ত।

উচ্চতম ন্যায়ালয়ে প্ৰশ্ন উত্থাপন কৰে যে যেতিয়া চৰকাৰে তদন্তৰ বাবে এছ আই টি গঠন কৰিছে, তেতিয়া এছ আই টিয়ে কোনো সিদ্ধান্তত উপনীত হোৱাৰ পূৰ্বে মুখ্যমন্ত্ৰীয়ে প্ৰেছত বক্তব্য দিয়াৰ প্ৰয়োজনীয়তা কি আছিল। উচ্চতম ন্যায়ালয়ে কয় যে সাংবিধানিক পদত অধিষ্ঠিত লোকৰ পৰা দায়িত্ব আশা কৰা হৈছে। যদি আপুনি তদন্তৰ ফলাফলৰ বিষয়ে নিশ্চিত নাছিল, তেন্তে আপুনি কেনেকৈ বক্তব্য দিলে? যদি আপুনি ইতিমধ্যে বিবৃতি দি আছে তেন্তে তদন্তৰ কি লাভ।