খোদ কৰ্তব্যৰত আৰক্ষীৰ বিৰুদ্ধে সেনা বিষয়াৰ বাগদত্তাই যৌন নিৰ্যাতনৰ অভিযোগ উত্থাপন কৰাত দেশজুৰি চাঞ্চল্যৰ সৃষ্টি কৰাৰ লগতে ওড়িশাৰ ৰাজনীতি গৰম হৈছে৷ নাৰীৰ সুৰক্ষাক লৈ গৰম হৈছে ওড়িশাৰ ৰাজনীতি৷ ঘটনাক গৰিহণা দি এয়া আচৰিত কাণ্ড বুলি অভিহিত কৰে প্ৰাক্তন মুখ্যমন্ত্ৰী, বিজু জনতা দলৰ সভাপতি তথা বিৰোধী দলৰ নেতা নবীন পাটনায়কে। ঘটনাক লৈ ন্যায়িক তদন্তৰ দাবী উত্থাপন কৰিছে নবীন পাটনায়কে। নবীন পাটনায়কে আদালতৰ নিৰীক্ষণত এছ আই টি গঠন কৰি তদন্ত কৰাৰ দাবী উত্থাপন কৰাৰ লগতে ন্যায়িক তদন্তৰ দাবী জনায়। অভিযোগ মতে, ওড়িশাৰ ভৰতপুৰ আৰক্ষী থানাত এগৰাকী সেনা মেজৰ আৰু তেওঁৰ বাগদত্তাক যৌন নিৰ্যাতন চলোৱা হৈছিল। আৰক্ষীৰ কাণ্ডক লৈ দেশৰ সচেতন নাগৰিকৰ বিবেকক জোকাৰি গৈছে। দেশক সেৱা কৰা সেনা বিষয়া আৰু তেওঁৰ হ’বলগীয়া পত্নীক বাৰে বাৰে শ্লীলতা হানি কৰা হৈছিল৷ আজি নাৰীবাদী সংগঠনে শুকুৰবাৰে আৰক্ষী ভৱনৰ সন্মুখত ধৰ্ণা দিয়ে৷ সেনা বিষয়াৰ ফিয়াঞ্চিৰ যৌন নিৰ্যাতনৰ অভিযোগত জড়িত অভিযুক্ত আৰক্ষীক গ্ৰেপ্তাৰৰ দাবী জনায়৷ তাৰ পাছতে ঘটনাৰ সৈতে জড়িত থকাৰ অভিযোগত পাঁচজন আৰক্ষীক চাকৰিৰ পৰা নিলম্বন কৰা হৈছে৷ ওড়িশা আৰক্ষীয়ে কয় যে ভুৱনেশ্বৰৰ ভৰতপুৰ আৰক্ষী থানাত এজন সেনা বিষয়াক আক্ৰমণ আৰু তেওঁৰ ফিয়াঞ্চিক উৎপীড়নৰ সন্দৰ্ভত পাঁচজন কৰ্মচাৰীক নিলম্বন কৰা হৈছে। আৰক্ষী সঞ্চালক প্ৰধান ৱাই বি খুৰানিয়াই জাৰি কৰা এক নিৰ্দেশ অনুসৰি পাঁচজন আৰক্ষী কৰ্মীক ঘোৰ অসদাচৰণৰ অভিযোগত নিলম্বিত কৰা হৈছে। ঘটনাৰ বিৱৰণ মতে, ১৪ ছেপ্টেম্বৰত ভুৱনেশ্বৰত ঘৰলৈ উভতিৰ সময়ত সেনা বিষয়া আৰু তেওঁৰ ফিয়াঞ্চিক হঠাতে অচিনাক্ত গুণ্ডাৰ এটা দলে খেদি আহে। সুৰক্ষাৰ বাবে নিকটতম আৰক্ষী চকীলৈ আহে৷ সেই সময়তে এজন আৰক্ষী পৰিদৰ্শকসহ কেইবাগৰাকী আৰক্ষীয়ে বক্ষক বাৰে বাৰে হাত দিছিল৷ বাধা দিয়াত আৰক্ষীয়ে দুয়োজনকে নিৰ্মমভাৱে আক্ৰমণ কৰিছিল। তাৰ পাছতে যুৱতীক বিবস্ত্ৰ কৰি যৌন নিৰ্যাতন কৰিছিল আৰু শাৰীৰিক ভাৱে অত্যাচাৰ কৰা হৈছিল। ভৰি স্কার্ফেৰে বান্ধি যৌন উৎপীড়ন চলাই শেষত চুলিত ধৰি টানি নিছিল৷ নিজকে ৰক্ষা কৰিবলৈ এক আকুল প্ৰচেষ্টাত যুৱতীয়ে এজন বিষয়াক কামুৰিছিল বুলি অভিযোগ কৰিছে। পৰৱৰ্তী সময়ত আৰক্ষী বিষয়াসকলে তেওঁলোকক গ্ৰেপ্তাৰ কৰি লকআপত থয়৷ পাছত গোচৰ ৰুজু কৰি জেল হাজোতলৈ প্ৰেৰণ কৰে যদিও ন্যায়ালয়ে জামিন প্ৰদান কৰে৷ ১৯ ছেপ্টেম্বৰত যুৱতীয়ে আঘাতৰ পৰা আৰোগ্য হৈ জিম্মাৰ পৰা মুকলি হয়। পিছত সংবাদ মাধ্যমত ঘটনাক লৈ বৰ্ণনা দি আৰক্ষীৰ বিৰুদ্ধে গোচৰ ৰুজু কৰে৷ বিৰোধী দলে বিজু জনতা দলে কয় যে ঘটনাই ৰাজ্যৰ বিজেপি চৰকাৰৰ অযোগ্যতাকে সূচাইছে। ৰাজ্যপাল ৰঘুবৰ দাসৰ পুত্ৰই ওড়িয়া বিষয়াক কৰা আক্ৰমণ হয়৷ বিজু জনতা দলৰ মুৰব্বী পাটনায়কে কয় যে যিদিনা বিজেপি চৰকাৰে আক্ৰমণৰ গুৰুতৰ গোচৰত ৰাজ্যপালৰ পুত্ৰৰ বিৰুদ্ধে ব্যৱস্থা ল’বলৈ অস্বীকাৰ কৰিছিল তেতিয়াই আনসকলে উৎসাহিত হৈছিল। মই এতিয়াও ৰাজ্যপালৰ পুত্ৰৰ বিৰুদ্ধে চৰকাৰক ব্যৱস্থা ল’বলৈ দাবী জনাইছো।