লাহোৱালৰ মোহনবাৰীত প্ৰতিবাদী সভা উজনি অসমৰ দুটাকৈ বিধানসভা সমষ্টি বিলুপ্ত কৰাত আজিও প্ৰতিক্ৰিয়া অব্যাহত আছে৷ বিশেষকৈ লাহোৱাল সমষ্টি বিলুপ্তি কৰা কাৰ্যক সহজে ল’ব পৰা নাই সমষ্টিটোৰ অন্তৰ্গত ৰাইজে৷ তাৰ মাজতে আজি বিলুপ্তি লাহোৱাল বিধানসভা সমষ্টিৰ পঞ্চায়তসমূহ ভাঙি পুনৰ সীমা নিৰ্ধাৰণ কৰাত ৰাইজ নাৰাজ হোৱা দেখা যায়৷ গাঁও পঞ্চায়তসমূহত খেলিমেলি কৰা কাৰ্যক সহজে ল’ব পৰা নাই ৰাইজে। আজি পূৰ্বৰ লাহোৱাল বিধানসভা সমষ্টিৰ মোহনবাৰী গাঁও পঞ্চায়তৰ মিৰিপথাৰ গাঁৱৰ ৪নং ৱাৰ্ডত এখন নাগৰিক সভা অনুষ্ঠিত কৰে৷ মিৰিপথাৰ গাঁৱৰ ৪নং ৱাৰ্ড মোহনবাৰী গাঁও পঞ্চায়তৰ পৰা কৰ্তন কৰাত জাঙুৰ খাই উঠিছে ৰাইজ। মোহনবাৰী গাঁও পঞ্চায়তৰ মিৰিপথাৰ গাঁও ৪নং ৱাৰ্ডটো কৰ্তন কৰি কানাই গাঁও পঞ্চায়তত অন্তৰ্ভুক্ত কৰাত ৰাইজ ক্ষোভিত হৈ পৰিছে। ৪নং ৱাৰ্ডটো কৰ্তন কৰি কানাই গাঁও পঞ্চায়তত অন্তৰ্ভুক্ত হোৱাটো নিবিচাৰে ৰাইজে। প্ৰতিবাদী সভাত বিধায়ক প্ৰশান্ত ফুকন মুৰ্দাবাদ, প্ৰশান্ত ফুকন গ’-বেক, মিৰিপথাৰ ৪নং ৱাৰ্ড কৰ্তন কৰিব দিয়া ন’হব আদি শ্ল’গান দিয়া পৰিলক্ষিত হয়। প্ৰতিবাদী সভাৰ জৰিয়তে মোহনবাৰী গাঁও পঞ্চায়তৰ পৰা মিৰিপথাৰ ৪নং ৱাৰ্ড কৰ্তন নকৰিবলৈ জিলা আয়ুক্তক দাবী জনায়। পৰৱৰ্তী সময়ত আয়ুক্ত, মুখ্যমন্ত্ৰীক স্মাৰক পত্ৰ প্ৰদান কৰিব বুলি জানিবলৈ দিয়ে স্থানীয় ৰাইজে।