মহাৰাষ্ট্ৰত বিগত প্ৰায় এটা পষেক ধৰি চলি থকা ৰাজনৈতিক অস্থিৰতাৰ অন্ত পৰিল । মাৰাঠা ৰাজ্যখনৰ ৰাজনীতিত বিজেপি নেতৃত্বাধীন মিত্ৰজোঁট মহাযুটিৰ মাজত দেখা দিয়া অচলাৱস্থাৰ অৱসান ঘটিছে । প্ৰাক্তন মুখ্যমন্ত্ৰী দেৱেন্দ্ৰ ফাড়নভিছ বিজেপি বিধায়িনী দলৰ নেতা হিচাপে নিৰ্বাচিত হৈছে। দেৱেন্দ্ৰ ফাড়নভিছে বৃহস্পতিবাৰে সন্ধিয়া ৫.৩০ বজাত ৰাজ্যখনৰ পৰৱৰ্তী মুখ্যমন্ত্ৰী হিচাপে শপত গ্ৰহণ কৰিব।

বিজেপিয়ে কেন্দ্ৰীয় বিত্ত মন্ত্ৰী নিৰ্মলা সীতাৰমণ আৰু গুজৰাটৰ প্ৰাক্তন মুখ্যমন্ত্ৰী বিজয় ৰুপানীক মহাৰাষ্ট্ৰ বিধায়িনী দলৰ বৈঠকৰ বাবে কেন্দ্ৰীয় পৰ্যবেক্ষক হিচাপে নিযুক্তি দিছিল। বিজেপিয়ে ইতিমধ্যে ঘোষণা কৰিছে যে নতুন মুখ্যমন্ত্ৰীয়ে ৫ ডিচেম্বৰত মুম্বাইৰ আজাদ ময়দানত প্ৰধানমন্ত্ৰী নৰেন্দ্ৰ মোদী আৰু অন্যান্য নেতাৰ উপস্থিতিত শপত গ্ৰহণ কৰিব।

শেহতীয়াকৈ অনুষ্ঠিত মহাৰাষ্ট্ৰ বিধানসভা নিৰ্বাচনত মহাযুটি মিত্ৰজোঁটে ২৮৮খন বিধানসভা আসনৰ ভিতৰত ২৩০খন আসন লাভ কৰিছিল। বিজেপিয়ে ১৩২খন আসন লাভ কৰি নেতৃত্ব দিছিল। আনহাতে শিৱসেনাই ৫৭খন আৰু এনচিপিয়ে ৪১খন আসন লাভ কৰিছিল।