এগৰাকী প্ৰখ্যাত সমাজসেৱিকাই বৌদ্ধ মঠৰ বাবে দান কৰিছে প্ৰায় ৩০ লাখ টকা মূল্যৰ ভূমি৷ মাৰ্ঘেৰিটাৰ মাকুম পাথাৰৰ মাছে গাঁৱত বৌদ্ধ মঠ নিৰ্মাণৰ বাবে এই ভূমি দান কৰিছে৷ আজি বৌদ্ধ মঠৰ উদ্বোধনী অনুষ্ঠানত অৰুণাচল প্ৰদেশৰ উপ-মুখ্যমন্ত্ৰী চাও চাউন মেইন, নামচাই সমষ্টিৰ বিধায়ক চাও জিংনু নামচুম, মাৰ্ঘেৰিটাৰ মহকুমাধিপতি থাউডাম পৰীক্ষিত আৰু ইষ্টাৰ্ন ফ্ৰণ্টিয়াৰ অঞ্চলৰ খ্ৰীষ্টান ধৰ্মীয় নেতা তেহোন হাকুন আদি উপস্থিত থাকে। আটাইকেইজনে প্ৰধান অতিথি আৰু বিশেষ অতিথি হিচাপে অংশগ্ৰহণ কৰে। চিৰৗে পাথাৰৰ প্ৰখ্যাত সমাজসেৱিকা জাহা চিংফৌৱে মাৰ্ঘেৰিটাৰ মাকুম পাথাৰৰ মাছে গাঁৱত স্থাপিত বৌদ্ধ মঠৰ বাবে ৪ কঠা মূল্যৱান জমি দান কৰিছে। উক্ত জমিখিনিৰ মুল্য প্ৰায় ৩০ লাখ টকা বুলি জানিব পৰা গৈছে। জাহা চিংফৌৱে মহৎ উদ্দেশ্যৰ বাবে লোৱা পদক্ষেপৰ বাবে অঞ্চলটোত ধর্মীয়, সাংস্কৃতিক আৰু সামাজিক ভেটি অধিক দৃঢ় হ’ব বুলি কয় ৰাইজে৷ জাহা চিংফৌৰ সমাজৰ বাবে কৰা মহৎ আৰু দৃষ্টান্তমূলক অৱদানৰ বাবে সকলোৱে প্ৰশংসা কৰিছে। তেওঁৰ এই ভূমিকা কেৱল এক ধৰ্মীয় অনুষ্ঠান স্থাপনেই নহয়, অঞ্চলটোৰ সম্প্ৰীতি আৰু একতা গঢ়ি তোলাৰ ক্ষেত্ৰতো এক অনুকৰণীয় পদক্ষেপ বুলি বিবেচিত হৈছে। স্থানীয় ৰাইজে তেওঁক আধুনিক যুগৰ দানবীৰ আখ্যা দি কৃতজ্ঞতা প্ৰকাশ কৰিছে।