অসমৰ আদিবাসীৰ সশস্ত্ৰ বিদ্ৰোহী সংগঠনসমূহে অসমৰ চৰকাৰৰ তত্বাৱধানত কেন্দ্ৰীয় চৰকাৰৰ সৈতে কেইবালানি আলোচনা কৰি শান্তি চুক্তি কৰিছিল৷ মূলসুঁতিলৈ উভতি অহা বিদ্ৰোহী সংগঠনসমূহক লৈ ৰাজ্য চৰকাৰে গঠন কৰিছিল আদিবাসী কল্যাণ আৰু উন্নয়ন পৰিষদ৷ পিছপৰা, সদা লাঞ্চিত-বঞ্চিত আদিবাসী জনগোষ্ঠীৰ সাধাৰণ ৰাইজৰ উন্নয়নৰ স্বাৰ্থত গঠিত আদিবাসী কল্যাণ আৰু উন্নয়ন পৰিষদে নতুন ৰূপ দিবলৈ প্ৰয়াস কৰিছে৷ চৰকাৰে পৰিষদক পুঁজি আৱণ্টন দি আঁচনি ৰূপায়নৰ দিশে আগবঢ়াৰ সময়তে আজি গুৱাহাটীত আদিবাসী কল্যাণ আৰু উন্নয়ন পৰিষদৰ প্রশাসনিক কার্যালয় মুকলি কৰা হয়৷ লগতে আজি পৰিষদখনৰ এটা ৱেবছাইট মুকলি কৰা হয়। মহানগৰীৰ পাঞ্জাবাৰীৰ ৰদালী পথত আদিবাসী কল্যাণ আৰু উন্নয়ন পৰিষদৰ প্রশাসনিক কার্যালয় তথা উপ-মুখ্য কাৰ্যবাহী সদস্যৰ কাৰ্যালয় আজি মুকলি কৰা হয়৷ ৰাজ্য চৰকাৰে নিৰ্মাণ কৰা কাৰ্যালয়টো মুকলি কৰে পৰিষদৰ উপ-কাৰ্যবাহী পিটাৰ দাঙে৷ কার্যালয়টো মুকলি কৰি দাঙে নতুনকৈ মুকলি কৰা ভৱনটোৰ পৰা আদিবাসী লোকসকলৰ কল্যাণৰ কাম-কাজে নতুন গতি পাব বুলি কয়৷ উপ-কাৰ্যবাহী সদস্য পিটাৰ দাঙে আদিবাসী লোকসকলৰ কল্যাণৰ বাবে কাম-কাজসমূহক পাৰদৰ্শি কৰিবলৈ ডিজিটেইলাইচেন কৰাৰ বাবে চিন্তা কৰা হৈছে বুলিও কয়৷ অনুষ্ঠানত পৰিষদৰ কাৰ্যবাহী দ্বিপেন নায়কসহ কেইবাগৰাকী বিশিষ্ট ব্যক্তি উপস্থিত থাকে৷