ডিজিটেল ডেস্কঃ শুকুৰবাৰে মুঠ ৮ টা দাবী উত্থাপিত কৰি ঢাকাৰ কেন্দ্ৰীয় ছহিদ মিনাৰত এক গণ সমাবেশ অনুষ্ঠিত কৰা হয়। বাংলাদেশত হোৱা হিন্দু নিৰ্যাতন আৰু মন্দিৰ আক্ৰমণৰ ঘটনাৰ বিচাৰৰ বাবে ন্যায়াধিকৰণ গঠন, দোষীক শাস্তি, ক্ষতিগ্ৰস্তক ক্ষতিপূৰণ প্ৰদান আৰু পুনৰ সংস্থাপনকে ধৰি ৮ টা দাবী উত্থাপন কৰে বাংলাদেশ সন্মিলিত সংখ্যালঘু জোঁটে।

আজি পুৱা কেন্দ্ৰীয় ছহিদ মিনাৰ প্ৰাংগণত আয়োজিত এই গণ সমাবেশত দলে দলে বিভিন্ন সনাতনী সংগঠনৰ বেনাৰত আন্দোলনকাৰীসকল সংগবদ্ধ হয় । শংখ বজাই আৰু জাতীয় সংগীত পৰিবেশন কৰি তেওঁলোকে এই সমাবেশ আৰম্ভ কৰে। সমাবেশত বাংলাদেশ সন্মিলিত সংখ্যালঘু জোঁটৰ প্ৰতিনিধি প্ৰদীপ ক্ৰান্তি দে’য়ে কয় যে, ৯ আগষ্টৰ পৰা আমি আন্দোলন কৰি আছো। আমাৰ ওপৰত যি অত্যাচাৰ হৈছে সেয়া বন্ধ কৰাৰ বাবে আমি সংগ্ৰাম কৰিছো। আমাৰ উদ্দেশ্য ক্ষমতালৈ অহা নহয়, দেশক অস্থিৰ কৰা নহয়। আমি কেৱল অধিকাৰৰ বাবে আহিছো। আমাৰ ৮ দফাৰ দাবী বাস্তৱায়িত কৰাৰ বাবেই আমি সংগ্ৰাম কৰিছো।

উল্লেখযোগ্য যে, সন্মিলিত সংখ্যালঘু জোঁটৰ ৮ দফীয়া দাবীৰ ভিতৰত আছে ধৰ্মীয় সংখ্যালঘু সম্প্ৰদায়ৰ ওপৰত হোৱা প্ৰতিটো নিৰ্যাতনৰ বিচাৰ আৰু নিহত, আহত, ক্ষতিগ্ৰস্তৰ পৰিয়াললৈ ক্ষতিপূৰণ, হিন্দু সম্প্ৰদায়ৰ উচ্চ শিক্ষাৰ বাবে বৈদিক বিশ্ববিদ্যালয় স্থাপন, ধৰ্মীয় সংখ্যালঘু নিৰ্যাতন ৰোধ কৰিবলৈ সংখ্যালঘু সুৰক্ষা আইন প্ৰণয়ন, শাৰদীয় দুৰ্গা পূজাৰ চৰকাৰী ছুটি ৫ দিন ঘোষণা কৰা, সকলো শিক্ষা প্ৰতিষ্ঠানত সনাতনী হিন্দু শিক্ষাৰ্থীৰ বাবে ধৰ্মীয় উপাসনাস্থলী স্থাপন আৰু ৬৪ জিলাত মডেল মন্দিৰসহ সনাতনী কৃষ্টি, সভ্যতা আৰু সাংস্কৃতিক কেন্দ্ৰ নিৰ্মাণ।