নগাঁও জিলাৰ ঐতিহাসিক ৰাইডঙীয়াত অনুষ্ঠিত ৰাস মহোৎসৱত দৰ্শনাৰ্থীৰ ভিৰ কৰা পৰিলক্ষিত হয়৷ প্ৰতিবছৰৰ দৰে এইবেলিও শ্ৰীশ্ৰী কৃষ্ণৰ ৰাস মহোৎসৱ সমিতিৰ উদ্যোগত ১৯ নৱেম্বৰৰ পৰা অনুষ্ঠিত ৰাস মহোৎসৱৰ আজি অন্তিম দিন৷ অন্তিম দিনটোত ৰাসস্থলী উদ্বোধন কৰে অনুসূচিত জাতি সংগ্ৰামী যুৱ পৰিষদৰ উপ-সভাপতি বিষ্ণু হাজৰিকাই৷ বিষ্ণু হাজৰিকাই ৰাসস্থলী মুকলি কৰি কয় যে এই বতৰত অসমৰ বহু ঠাইত ৰাস হয়৷ ৰাসসমূহে মহা মিলনৰ সেঁতু গঢ়ে৷ গোটেই বছৰতো কষ্ট কৰি শৰৎকালৰ এই সময়ছোৱাত আমি আনন্দ কৰো৷ বাৰিষা গুচি যোৱাৰ পিছতে জাৰ নামি অহাত ৰাস্তা-ঘাটৰ পৰা বোকা-পানী নোহোৱা হয়৷ পথাৰত ধান কটাৰ সময় যদিও আমি নতুন এটা বছৰত যুঁজিবলৈ সাহস গোটাও এই ৰাস উৎসৱত৷ শান্তি, প্ৰগতিৰ বাট দেখুৱাই এই ৰাসে৷ অন্তিম দিনটোৰ কাৰ্যসূচীৰ আঁতধৰে প্ৰমোদ কুমাৰ দাসে৷ ঐতিহ্যমণ্ডিত ৰাস মহোৎসৱত সন্ধিয়াৰ পৰাই ভক্তৰ লানি নিছিগা সোঁত বোৱা পৰিলক্ষিত হয়৷ তিনিওটা দিনত মাধৱ মন্দিৰ প্ৰাংগনত ফৰিং ফুটা ৰূপালী জোনাকত কৃষ্ণই গোপীসকলৰ সৈতে কৰা ৰাস ক্ৰীড়াৰ দৰেই অপূৰ্ব সমাহাৰ দেখা যায়৷ ৰাইডঙীয়া পাঁচআলিৰ শ্ৰীশ্ৰী মাধৱদেৱ মন্দিৰ প্ৰাংগনত অনুষ্ঠিত ৰাস মহোৎসৱত নিতৌ ভক্তই শ্ৰী কৃষ্ণৰ ৰাস লীলা উপভোগ কৰে৷ স্থানীয় মহিলা, জীয়ৰী, বোৱাৰীৰ ৰাস লীলা বৃন্দাবনত পৰিণত কৰে ৰাইডঙীয়াৰ মাধৱ মন্দিৰ প্ৰাংগনক৷ ভক্তপ্ৰাণ ৰাইজ উপস্থিতি থাক সহায়-সহযোগ কৰাত ধন্যবাদ জ্ঞাপন কৰিছে শ্ৰীশ্ৰী কৃষ্ণৰ ৰাস মহোৎসৱ সমিতিয়ে৷