Brahmaputra Times
ৰঙাপাৰাঃ কৰ্মৰত অৱস্থাতে শোণিতপুৰ জিলাৰ ৰঙাপাৰাত বিদ্যুৎস্পৃষ্ট হৈ এজন শ্ৰমিকৰ মৃত্যু ঘটাৰ ঘটনাই সমগ্ৰ অঞ্চলটোতে শোকৰ ছাঁ পেলাইছে। শনিবাৰে সংঘটিত এই দুৰ্ঘটনাত নিহত শ্ৰমিকজনক ৰঙাপাৰা চাহ বাগিচাৰ ভঙাবিল লাইনৰ নিৱাসী ২২ বৰ্ষীয় সূৰজ ধনোৱাৰ বুলি চিনাক্ত কৰা হৈছে।
জানিব পৰা মতে, ৱাৰিছ ইঞ্জিনিয়াৰিং অবজাৰ্ভাৰ নামৰ এটা প্ৰতিষ্ঠানত কৰ্মৰত আছিল সূৰজ ধনোৱাৰ। শনিবাৰে কৰ্মৰত অৱস্থাতে যুৱকজন বিদ্যুৎস্পৃষ্ট হোৱাত তেওঁক সংকটজনক অৱস্থাত তেজপুৰৰ এখন হাস্পতাললৈ লৈ যোৱা হয় যদিও চিকিৎসকে মৃত ঘোষণা কৰে।
ইফালে এই ঘটনাৰ খবৰ লাভ কৰাৰ পিছতে ৰঙাপাৰা আৰক্ষী ঘটনাস্থলীত উপস্থিত হৈ দুৰ্ঘটনাটোৰ পৰিস্থিতিৰ তদন্ত কৰে। আনহাতে গাড়ীৰ তেলৰ টেংক নিৰ্মাণৰ বিশেষজ্ঞ কোম্পানীটোৱে কৰ্মচাৰীৰ সুৰক্ষাক আওকাণ কৰা বুলি দাবী কৰি তেওঁৰ পৰিয়ালে ৱাৰিছ ইঞ্জিনিয়াৰিং অবজাৰ্ভাৰৰ বিৰুদ্ধে গুৰুতৰ অভিযোগ উত্থাপন কৰিছে।
