অসম সাহিত্য সভাৰ পৰৱৰ্তী সভাপতি কোন হ’ব তাক লৈ তোলপাৰ লাগিছে সভাৰ ভিতৰচ’ৰা ৷ সভাপতিৰ আসনক লৈ চলিছে বিচিত্ৰ ৰাজনীতি ৷ অভিযোগ উঠিছে সাহিত্যিকৰ পৰিৱৰ্ত এইবাৰো অসাহিত্যিকৰ ভিৰ লাগিছে সভাপতিৰ আসন দখল কৰিবলৈ ৷ এই লৈ ৰাজ্যজুৰি সভাৰ শুভাকাংক্ষীসকলৰ মাজত তীব্ৰ প্ৰতিক্ৰিয়া হোৱাত কৌশল সলনি কৰি সভাপতিৰ পেনেল সলনি কৰি মান ৰক্ষা কৰিবলৈ আগবাঢ়িছে সভাৰ বৰ্তমানৰ নেতৃত্ব ।

অসম সাহিত্য সভাৰ বৰ্তমানৰ উপ-সভাপতি গিৰীশ সন্দিকৈক সভাপতি পাতিবলৈ এটা চক্ৰই উঠি-পৰি লাগিছিল । বিতৰ্কৰ আৱৰ্তত সোমাই পৰিছিল অসম সাহিত্য সভাৰ বিষয়ববীয়া নিৰ্বাচনৰ বাবে গঠন কৰি দিয়া উচ্চস্তৰীয় সমিতিখন । গোপনীয় তালিকা ৰাজহুৱাভাৱে চৰ্চিত হোৱাত কঠোৰ সমালোচিত হয় অসম সাহিত্য সভা ৷ যাৰবাবে অৱশেষত পৰৱৰ্তী সভাপতিৰ পেনেল বাতিলৰ প্ৰস্তাৱ দিবলৈ বাধ্য হ’ল অসম সাহিত্য সভাৰ বৰ্তমানৰ সভাপতিগৰাকীয়ে । অসম সাহিত্য সভাৰ উচ্চস্তৰীয় সূত্ৰৰ তথ্য অনুসৰি অসম সাহিত্য সভাৰ বৰ্তমানৰ সভাপতি সূর্যকান্ত হাজৰিকাই অসম সাহিত্য সভাৰ বিষয়ববীয়া নিৰ্বাচনৰ বাবে গঠন কৰি দিয়া উচ্চস্তৰীয় সমিতিক লিখিত এক প্ৰস্তাৱ আগবঢ়ায় ।

উল্লেখযোগ্য যে অসম সাহিত্য সভাৰ পৰৱৰ্তী পূর্ণাংগ অধিবেশনখন পাঠশালাত অনুষ্ঠিত হ’ব । ইয়াৰ পূৰ্বে সভাৰ ৮৪৯ খন সক্রিয় শাখাই এই নির্বাচনত ভোটদান কৰি বিষয়ববীয়া নিৰ্বাচন কৰিব । আনহাতে সভাৰ সভাপতি নির্বাচনক লৈ এইবাৰ সভাই আকৌ এবাৰ সংবিধান সংশোধন কৰি এখন সাতজনীয়া এখন উচ্চস্তৰীয় সমিতি গঠন কৰে । এই সমিতিয়ে পাঁচ গৰাকী ব্যক্তিক নির্বাচন কৰিব ৷ সভাপতি সূৰ্যকান্ত হাজৰিকাৰ প্ৰস্তাৱমতেই এতিয়া আকৌ নতুন ৫ জনীয়া তালিকা প্ৰস্তুত কৰাৰ দিশে আগবাঢ়িছে অসম সাহিত্য সভা ।

সভাপতিৰ নিৰ্বাচনক বিতৰ্কত কি পৰিকল্পনা আছিল ?

২০২৫-২৭ বৰ্ষৰ সভাপতি নিৰ্বাচন প্ৰক্ৰিয়া আৰম্ভ হোৱাৰ লগে লগে উচ্চস্তৰীয় সমিতিখনে এজন ৫ জনীয়া তালিকা প্ৰস্তুত কৰিছিল ৷ অভিযোগ উঠে যে য’ত কেৱল সাহিত্য জগতলৈ বিশেষ অৱদান নথকা বৰ্তমানৰ উপ সভাপতি গিৰীশ সন্দিকৈক সভাপতি পতাৰ বাবে ব্লুপ্ৰিণ্ট পতা হয় । সভাৰ বৰ্তমানৰ প্ৰধান সম্পাদক উপেন্দ্ৰজিৎ শৰ্মাৰ বিৰুদ্ধে উঠে এই ক্ষেত্ৰত নেতৃত্ব লোৱাৰ অভিযোগ । এই অভিযোগ এতিয়ালৈ খণ্ডন কৰা নাই প্ৰধান সম্পাদকগৰাকীয়ে । চৰ্চা অনুসৰি- নিৰ্বাচনী নীতি অনুসৰিয়েই উচ্চস্তৰীয় সমিতিখনে গিৰীশ সন্দিকৈক সভাপতিৰ আসন বহুৱাবৰ বাবেই এখন ৫ জনীয়া তালিকা প্ৰস্তুত কৰিছিল ৷ এই ৫জনৰ ৪ জনেই শেষত সভাপতি হোৱাৰ প্ৰস্তাৱ বাতিল কৰাৰ পূৰ্ণ সম্ভাৱনা আছিল । ফলত মুকলি হ’লহেঁতেন গিৰীশ সন্দিকৈৰ সভাপতি হোৱাৰ বাট ।

ৰাজ্যজোৰা সমালোচনাৰ অন্তত বিষয়টোৰ গুৰুত্ব উপলব্ধি কৰি লোকলজ্জা ৰক্ষাৰ স্বাৰ্থতে এতিয়া থমকি ৰৈছে কৌশলেৰে অসাহিত্যিক ব্যক্তিক অসম সাহিত্য সভাৰ সভাপতি পতাৰ ৰাজনীতি । গিৰীশ সন্দিকৈৰ পৰিৱৰ্তে আন কোনো এগৰাকী প্ৰসিদ্ধ সাহিত্যিকক সভাপতিৰ আসনত বহোৱাৰ কৰাৰ পৰিকল্পনা কৰিছে চক্ৰটোৱে ৷ হয়তো এগৰাকী মহিলা লেখিকা হ’বগৈ পাৰে অসম সাহিত্য সভাৰ নতুন সভাপতিৰ প্ৰাৰ্থী ।

সভাপতিৰ নতুন তালিকাত কাৰ কাৰ নাম?

সভাৰ ভিতৰুৱা তথ্য অনুসৰি সভাপতি সূৰ্যকান্ত হাজৰিকাৰ প্ৰস্তাৱমতে এতিয়া নতুন তালিকা প্ৰস্তুত হোৱাৰ পথত আগবাঢ়িছে ৭ জনীয়া সমিতিখন ৷ এইবাৰ সাহিত্য সভাৰ পৰৱৰ্তী সভাপতিৰ তালিকাত নাম অন্তৰ্ভুক্ত কৰিবলৈ ওলাইছে বিশিষ্ট সাহিত্যিক ৰীতা চৌধুৰী, অৰূপা পটংগীয়া কলিতা, জয়ন্ত মাধৱ বৰা, ফণীন্দ্ৰ কুমাৰ দেৱচৌধুৰী, উপেন ৰাভা হাকাচাম, সমীৰ তাঁতীৰ নাম । জানিব পৰা মতে ইয়াৰে দুগৰাকীমান সাহিত্যিকে সন্মতি জনাইছে যদিও এগৰাকীও মহিলা সাহিত্যিকে বৰ্তমানলৈকে জনোৱা নাই সন্মতি । স্বাভাৱিকতে প্ৰশ্ন উঠে হঠাৎ কিয় বোধোদয় হ’ল অসম সাহিত্য সভাৰ সভাপতি সূৰ্যকান্ত হাজৰিকাৰ ? কিয় তেওঁ দিলে পৰৱৰ্তী সভাপতিৰ নতুন তালিকাৰ প্ৰস্তাৱ ? আচলতে এয়া বোধোদয় নে লোকলজ্জা নিৰসনৰ উপায় ?