দিল্লীৰ প্ৰদূষণৰ মাত্ৰাৰ প্ৰতি লক্ষ্য ৰাখি ভাৰতৰ মুখ্য ন্যায়াধীশ সঞ্জীৱ খান্নাই মঙলবাৰে উচ্চতম ন্যায়ালয়ক সম্পূৰ্ণ অনলাইন ব্যৱস্থালৈ স্থানান্তৰিত কৰাৰ বাবে জ্যেষ্ঠ অধিবক্তাসকলে কৰা অনুৰোধ নাকচ কৰে ৷ লগতে সকলো ন্যায়াধীশক য’তেই সম্ভৱ ভাৰ্চুৱেল শুনানিৰ অনুমতি দিবলৈ তেওঁ কয় ৷

উচ্চতম ন্যায়ালয়ৰ বাৰ এছ’চিয়েশ্যনৰ (Supreme Court Bar Association চমুকৈ SCBA) সভাপতি কপিল ছিবালে ভাৰতৰ মুখ্য ন্যায়াধীশৰ নেতৃত্বত আৰু ন্যায়াধীশ সঞ্জয় কুমাৰক লৈ গঠিত বিচাৰপীঠৰ সন্মুখত দিল্লী আৰু NCR ত প্ৰদূষণ বৃদ্ধি পোৱাৰ কথা উল্লেখ কৰে । মুখ্য ন্যায়াধীশ সঞ্জীৱ খান্নাই কয়, ‘‘আমি সকলো ন্যায়াধীশক কৈছো যে য’তেই সম্ভৱ ভাৰ্চুৱেল শুনানিৰ অনুমতি দিব লাগে ।’’ ছিবালে কয়, ‘‘এই প্ৰদূষণৰ মাত্ৰা নিয়ন্ত্ৰণৰ বাহিৰলৈ গৈ আছে ।’’ ইফালে ছিবালক বিভিন্ন অধিবক্তাই সমৰ্থন কৰিছিল ।

অৱশ্যে উচ্চতম ন্যায়ালয়ৰ কামকাজ অনলাইন মাধ্যমৰ হ’ব লাগে বুলি কৰা যুক্তি বিচাৰপীঠে মানি লোৱা নাছিল । বিচাৰপীঠে স্পষ্ট কৰি দিয়ে যে অধিবক্তাসকলৰ অনলাইনত হাজিৰ হোৱাৰ বিকল্প আছে।

উল্লেখ্য যে, সোমবাৰে উচ্চতম ন্যায়ালয়ে এক বিজ্ঞপ্তিযোগে ৰাজধানীত প্ৰদূষণৰ মাত্ৰা ভয়াৱহ হোৱাৰ বাবে কৰ্মচাৰীসকলক মাস্ক পৰিধান কৰিবলৈ পৰামৰ্শ দিয়ে ৷