চিদলী বিধানসভা সমষ্টিৰ উপ-নিৰ্বাচনৰ বাবে বি পি এফ আৰু ইউ পি পি এল দলৰ প্ৰাৰ্থী ঘোষণা। ১৬ নং নিচিমা পৰিষদীয় সমষ্টিৰ প্ৰাক্তন পাৰিষদ তথা চিৰাং জিলা ইউ পি পি এলৰ সভাপতি নিৰ্মল কুমাৰ ব্ৰহ্মক ইউ পি পি এল দলৰ প্ৰাৰ্থী হিচাপে সোমবাৰে ঘোষণা কৰা হয়।

চিৰাং জিলাৰ কাশিকোত্ৰাস্থিত এন ডি এ মিত্ৰজোঁটৰ নিৰ্বাচনী পৰিচালনা সমিতিৰ কাৰ্যালয়ত বিজেপি, অগপৰ লগতে দলীয় নেতৃত্বৰ উপস্থিতিত এক সংবাদমেল আয়োজন কৰি এই ঘোষণা কৰে ইউ পি পি এল দলৰ সাধাৰণ সম্পাদক ৰাজু কুমাৰ নাৰ্জাৰীয়ে।

নিৰ্মল কুমাৰ ব্ৰহ্মক ইউ পি পি এল তথা মিত্ৰজোঁটৰ প্ৰাৰ্থী হিচাপে ঘোষণা কৰাৰ পাছতেই কাশিকোত্ৰাত প্ৰাক-দীপাৱলীসদৃশ পৰিৱেশৰ সৃষ্টি হয় । আতচবাজী আৰু পুষ্পবৃষ্টিৰ মাজেৰে প্ৰাৰ্থী নিৰ্মল কুমাৰ ব্ৰহ্মক আদৰণি জনোৱা হয় । উপস্থিত মিত্ৰজোঁটৰ নেতা কৰ্মীসকলে আৰ’নাই, ফুলাম গামোচাৰে তেওঁক উষ্ণ আদৰণি জনোৱাৰ লগতে শুভেচ্ছা জনায় ।