বহু প্ৰত্যাশিত এখন অসমীয়া ছবি ‘চিকাৰ’ । বিগ ফিল্মছ মিডিয়া আৰু ডীক্ৰেটিভ ষ্টুডিঅ’ এল এল পি (ইণ্ডিয়া)ৰ বেনাৰত নিৰ্মাণ কৰা ছবিখনে আজি অসমৰ ছবিগৃহত মুক্তি লাভ কৰিব।

নতুন অসমীয়া ছবি চিকাৰৰ জৰিয়তে হাৰ্টথ্ৰ’ব জুবিন গাৰ্গক আকৌ এবাৰ নতুন ৰূপত পৰ্দাত দেখিবলৈ পাব দৰ্শকে। লগতে ছবিখনত আছে বিশিষ্ট অভিনেতা আদিল হুছেইন, সিদ্ধাৰ্থ শৰ্মা, অন্তৰীক্ষ চহৰীয়া, ধ্যানী মোহন, যতীন খনিকৰ, সঞ্জীৱ বুঢ়াগোঁহাইকে ধৰি কেইবাগৰাকী অভিনেতা-অভিনেত্ৰী।

অসমৰ চাহ উদ্যোগৰ অন্ধকাৰ দিশটো উন্মোচন কৰা হৈছে ছবিখনত। অসমৰ চাহৰ জনপ্ৰিয়তা থকা স্বত্বেও উদ্যোগটোত শ্ৰমিকসকলক কম মজুৰি দিয়া, মহিলাৰ প্ৰতি অত্যাচাৰ কৰা আৰু শ্ৰমিকসকল বেয়াকৈ ক্ষতিগ্ৰস্ত হোৱা আদি ঘটনাৰ আধাৰত নিৰ্মাণ কৰা হৈছে ছবিখন।

দেবাংকৰ বৰগোঁহাইৰ কাহিনী পৰিচালনা তথা সম্পাদনাৰে নিৰ্মাণ কৰা এই ছবিখনৰ চিত্ৰনাট্য আৰু সংলাপ হৈছে বিষ্ণুজ্যোতি সন্দিকৈ আৰু বেদান্তৰ। এই ছবিখনৰ শ্বুটিং অসমৰ লগতে লণ্ডনত কৰা হৈছে। ছবিখনৰ প্ৰায় ৭০ শতাংশ শ্বুটিঙেই কৰা হৈছে লণ্ডনত।