উপ-নিৰ্বাচনত বিশেষ অফাৰ দিছে বিজেপিয়ে৷ এতিয়া নলগোৱা পৰিয়ালৰ ঘৰে ঘৰে গৈ স্মাৰ্ট মিটাৰ লগাই দিব৷ আলু-পিঁয়াজৰ দাম বঢ়াই দিব৷ ৭০ টকাৰ আলু ১০০ টকা কৰি দিব৷ ৪০০ টকা ৰন্ধন গেছৰ চিলিণ্ডাৰ ১১০০ টকা কৰি দিব৷ এই অফাৰসমূহৰ বাবে উপ-নিৰ্বাচনত চামগুৰি আৰু বিহালীৰ ৰাইজে বিজেপিক ভোট দিয়ক৷ এই দাবী উত্থাপন কৰি ৰাজপথত ভোটভিক্ষা কৰিছে কেইজনমান লোকে৷ এই লোককেইজনে হাতত এখন বিশেষ বেনাৰ লৈ চামগুৰি বজাৰ আৰু বিহালী আৰক্ষী থানাৰ সমীপত বিজেপিৰ হৈ ভোটভিক্ষা কৰিছে৷ বাটৰ নাট কৰাৰ দৰেই ৰাজহুৱা স্থানত থিয় হৈ বিজেপিক ভোট দিলে কেনেদৰে উপকৃত হ’ব সেই কথা ৰাইজক বুজনি দিছে৷ মিঠাতেলৰ বটলক মাইক্ৰফোন সজাই ৰাইজক সম্বোধন কৰি লোককেইজনে কয় যে ৰাইজ শুনক শুনক আৰু শুনক৷ বিজেপিয়ে বহুত ভাল কাম কৰিছে৷ বিজেপি আমাক স্মাৰ্ট মিটাৰ লগাই দিছে৷ ২০ টকাৰ আলু-পিঁয়াজ ৭০ টকা কৰি দিছে৷ ৭০ টকাৰ মিঠাতেল ২০০ টকাত দিছে, অনুসূচিত জাতিৰ মাছমৰীয়াৰ ভাট্টা বন্ধ কৰি দিছে৷ অনুসূচিত জাতিক মাটিৰ পট্টা দিয়া নাই৷ সকলো খাদ্য-সামগ্ৰীৰ দাম বৃদ্ধি কৰি দিছে৷ সেয়েহে ইমানখিনি অফাৰ দিয়া বিজেপিক চামগুৰি সমষ্টি আৰু বিহালী সমষ্টিত ভোট দিয়ক৷ তেতিয়া বিজেপিয়ে আৰু দুগুন উৎসাহেৰে আপোনোলাকক অফাৰ দি যাব৷ প্ৰকৃততে চামগুৰি আৰু বিহালী সমষ্টিৰ অনুসূচিত জাতিৰ লোকক সজাগ কৰিবলৈ এয়া আছিল এক পথৰ সজাগতা সভাহে৷ প্ৰতীকী ৰূপত শাসকীয় দলক আক্ৰমণ কৰি বিজেপিক বিফল হোৱাৰ অভিযোগ আনে৷ অনুসূচিত জাতি সমগ্ৰামী যুৱ পৰিষদ আৰু কেইজনমান সমাজকৰ্মীয়ে পথত ৰাইজক সজাগ কৰিবলৈ প্ৰয়াস কৰিছে৷ আজি দিনৰভাগত চামগুৰি বজাৰ আৰু বিহালী আৰক্ষী থানাৰ সমীপত সঞ্জীৱ দাস, দুলাল বৰা, বিৰিঞ্চি বৰাৰ উপস্থিতিত এনে ব্যতিক্ৰমী তথা অভিনৱ প্ৰতিবাদ সাব্যস্ত কৰে৷ অসম অনুসূচিত জাতি সংগ্ৰামী যুৱ পৰিষদৰ সভাপতি সঞ্জীৱ দাস এই প্ৰতিবাদী কাৰ্যসূচীত উপস্থিত থাকি কয় যে এইখন চৰকাৰৰ দিনত অনুসূচিত জাতিৰ লোক সুৰক্ষিত নহয়৷ এইখন চৰকাৰৰ দিনত ছয়মাহৰ ভিতৰত অনুসূচিত জাতি কল্যাণ সঞ্চালকালয়ৰ পৰা ১৪০ কোটি টকা নোহোৱা হৈছে৷ অনুসূচিত জাতিৰ লোক হৈও মন্ত্ৰী পীয়ুষ হাজৰিকাই মাত নামাতিলে৷ বিহালী সমষ্টিৰ কথা উল্লেখ কৰি দাসে কয় যে বিহালী সমষ্টিৰ অনুসূচিত জাতিৰ লোকক মাটি পট্টা দিয়া নহ’ল৷ বিহালী সমষ্টিতে ৰাজ্যৰ ভিতৰতে বেছি অনুসূচিত জাতিৰ মাছমৰীয়া আছে৷ এই মাছমৰিয়াসকলক পূৰ্বে বিশেষ ভাট্টা দিয়া হৈছিল৷ কিন্তু অনুসূচিত জাতিৰ মাছমৰীয়াৰ ভাট্টা বন্ধ কৰা হৈছে৷ এইবোৰ কথাত মুখ্যমন্ত্ৰী আৰু পীয়ুষ হাজৰিকাই মাত নামাতে৷ উপ-নিৰ্বাচন অহাৰ লগে লগে দিছপুৰখন উঠি আহিছে৷ কিন্তু একেলগে থকা ১০ হাজাৰ লোকক মাটিৰ পট্টা দিব নোৱাৰিলে৷ ডি-ভোটাৰ হৈ আছে সেই সমস্যা সমাধান নকৰিলে৷ ভোট লাগে৷ কিন্তু অনুসূচিত জাতিৰ কাম নকৰে৷ অনুসূচিত জাতিৰ লোকৰ বাবে অহা টকা মুখ্যমন্ত্ৰী আৰু পীয়ুষ হাজৰিকাই কেইজনমান ঠিকাদাৰৰ দ্বাৰা হৰলুকি কৰিলে৷ বিহালী সমষ্টিৰ ৰাইজে মুখ্যমন্ত্ৰী আৰু পীয়ুষ হাজৰিকাই প্ৰশ্ন কৰক অনুসূচিত জাতিৰ ১৪০ কোটি কোনে খালে৷ অনুসূচিত জাতিৰ ছাত্ৰ-ছাত্ৰীৰ জলপানিৰ টকা কোনে খালে৷ ভূমিপট্টা, মাছমৰীয়াৰ ভাট্টা কোনে খায় আছে সেই প্ৰশ্ন কৰিবলৈ আৰম্ভ কৰক৷ সঞ্জীৱ দাসে অনুসূচিত জাতিৰ লোকসকল বিজেপি বিৰোধী বুলি দাবী কৰি কয় যে বিজেপিয়ে অনুসূচিত জাতিক ঠগ-প্ৰৱঞ্চনা কৰিছে৷ আঁচনিৰ টকাৰ অপব্যৱহাৰ কৰিছে৷ সমাজকৰ্মী বিৰিঞ্চি বৰাই নিজকে বিজেপি নেতাৰ বুলি পৰিচয় দি কয় যে ভাৰতীয় জনতা পাৰ্টীক ভোট দিবলৈ কবৰ বাবে আমি বিহালীলৈ আহিছো৷ উপ-নিৰ্বাচনৰ পাৰ হৈ যোৱাৰ পাছতে আমি জয়ী হ’লে যিসকলৰ ঘৰত এতিয়ালৈ স্মাৰ্ট মিটাৰ লগা নাই সেইসকলৰ ঘৰে ঘৰে গৈ আমি স্মাৰ্ট মিটাৰ লগাই দিম৷ বৰ্তমান ৭০ টকা হৈ থকা আলু-পিঁয়াজৰ দাম ১০০ টকা কৰি দিম৷ থলুৱাৰ মাটি উচ্ছেদ কৰি মাটিসমূহ আদানীক গটাই দিম৷ স্কুল বিলাক বন্ধ কৰি ব্যক্তি গত খণ্ডৰ স্কুল খোলাৰ ব্যৱস্থা কৰিম৷ সন্তানে যদি পঢ়িব নোৱাৰে তেন্তে মুখ্যমন্ত্ৰীৰ পত্নীৰ বাগিচা, ৰিজৰ্টত ৱেটাৰৰ কাম কৰাৰ সুবিধা দিম৷ লগতে বিৰিঞ্চি বৰাই কয় যে বিজেপিয়ে পূৰ্বে খিলঞ্জীয়া আৰু হিন্দুৰ কথা কৈ ৰাজনীতি কৰিছিল৷ কিন্তু চামগুৰিত মিঞা মিঞা বুলি কৈ ঠাট্টা কৰা মিঞাৰ ভোট বিচাৰি প্ৰচাৰ কৰিছে৷ এবিধ বিশেষ মাংস খুৱাই ভোট ভিক্ষা কৰিছে বুলি বিস্ফোৰণ ঘটাই বিৰিঞ্চি বৰাই৷ হঠাতে বিজেপিৰ বিৰুদ্ধে অভিনৱ প্ৰতিবাদ সাব্যস্ত কৰাত দুয়োটা সমষ্টিত তীব্ৰ চৰ্চা হ’ব ধৰিছে বুলি জানিব পৰা গৈছে৷