“২০২১ চনৰ মে’ মাহৰ পৰা ২০২২ চনৰ আগষ্টলৈকে অসমত ১৭১ টা আৰক্ষীৰ এনকাউণ্টাৰৰ ঘটনা উদ্বেগজনক” এই মন্তব্য আগবঢ়াইছে উচ্চতম ন্যায়ালয়ৰ এখন বিচাৰপীঠে।  লগতে এই বিষয়বোৰত চলোৱা তদন্তৰ বিষয়ে বিৱৰণ বিচাৰি ইয়াক ‘অতি গুৰুতৰ বিষয়’ হিচাপে উল্লেখ কৰে। তেওঁ কয় যে মানৱ অধিকাৰ আয়োগে সত্যটো জানিবলৈ প্ৰয়োজনীয় পদ্ধতি ব্যৱহাৰ কৰা উচিত।”

ন্যায়াধীশ সূৰ্য কান্ত আৰু উজ্জল ভূঞাৰে গঠিত এখন বিচাৰপীঠে কয় : “অসমত এইটো এটা অতি গুৰুতৰ বিষয় । এশ এসত্তৰটা ঘটনা উদ্বেগজনক…।”

শীৰ্ষ ন্যায়ালয়ে ৰাজ্যখনক এই ১৭১ টা ঘটনাৰ বিৱৰণ দাখিল কৰিবলৈও কয় । ইয়াৰ ভিতৰত আছে এই গোচৰবোৰৰ তদন্ত কোনে কৰিছিল আৰু এই গোচৰবোৰৰ ফলাফল কি আছিল । বিচাৰপীঠে কয়, “ৰাজ্যখনৰ অতীত অতি সমস্যাজৰ্জৰ ।”

শীৰ্ষ ন্যায়ালয়ে ২০২৩ চনৰ জানুৱাৰীত গুৱাহাটী উচ্চ ন্যায়ালয়ে প্ৰদান কৰা আদেশৰ বিৰুদ্ধে এক আবেদনৰ শুনানি গ্ৰহণ কৰি এইকথা কয় । লগতে অসম আৰক্ষীয়ে এই এনকাউণ্টাৰ সম্পৰ্কীয় বিষয়টো উত্থাপন কৰা এখন পি আই এল খাৰিজ কৰে । উচ্চ ন্যায়ালয়ৰ সন্মুখত আবেদনকাৰীয়ে দাবী কৰিছিল যে ২০২১ চনৰ মে’ মাহত অসম আৰক্ষীয়ে লেখ আবেদন দাখিল কৰাৰ তাৰিখলৈকে ৮০ টাতকৈও অধিক ‘ভুৱা এনকাউণ্টাৰ’ সংঘটিত কৰিছিল ।

মঙলবাৰে শুনানিৰ সময়ত আবেদনকাৰী আৰিফ মহম্মদ য়াছিন জোৱাড্ডাৰক প্ৰতিনিধিত্ব কৰা অধিবক্তা প্ৰশান্ত ভূষণে বিচাৰপীঠৰ সন্মুখত দাবী কৰে যে অসমত বৃহৎসংখ্যক এনকাউণ্টাৰ সংঘটিত হৈছে ।

আনহাতে, অসম চৰকাৰক প্ৰতিনিধিত্ব কৰা এগৰাকী অধিবক্তাই কয় যে উচ্চ ন্যায়ালয়ে পি আই এলৰ বিচাৰ কৰাৰ বাবে আগ্ৰহী নহয় আৰু ইয়াক অপৰিক্ব বুলি অভিহিত কৰে । বিচাৰপীঠে কয়, “এনে ধৰণৰ আবেদনক অপৰিপক্ব বুলি আঁতৰাই ৰাখিব নোৱাৰি ।”

বিচাৰপীঠে স্পষ্ট কৰি দিয়ে যে এইটো এটা প্ৰতিকূল গোচৰ নহয় আৰু ই বিষয়টোৰ সংবেদনশীলতা আৰু ৰাজ্যখনৰ ভৌগোলিক অৱস্থানৰ বিষয়েও সচেতন ।