পেৰিছ অলিম্পিক ২০২৪ত সোণৰ পদক লাভৰ সম্ভাৱনা থকাৰ পাছতো ওজনৰ বাবে ফাইনেলখনত অৱতীৰ্ণ হ’ব নোৱাৰা মহিলা মল্লযোদ্ধা বীৰাংগনা বিনেশ ফোগাট আজি দেশত উপস্থিত হৈছে৷ পৰৱৰ্তী সময়ত আন্তঃৰাষ্ট্ৰীয় ক্ৰীড়াৰ আদালতত চলা গোচৰত নিৰাশ কৰা হয় বিনেশ ফোগাটক৷ তাৰ পাছতে আজি পেৰিছৰ পৰা দিল্লীত উপস্থিত হয় বিনেশ ফোগাট৷ দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত উপস্থিত হোৱাৰ পাছতে হাজাৰ হাজাৰ লোকে তেওঁক আদৰণি জনায়৷ ঢোল, পেঁপা বজাই দেশৰ কন্যাগৰাকীক আদৰে ৰাইজে৷

টকাৰ মালা, ফুলৰ মালা আদি পিন্ধাই খোলা গাড়ীত ভ্ৰমণ কৰাই৷ দিল্লী বিমানবন্দৰৰ পৰা বালালীলৈ আদৰণি নিয়া হ’ব বিনেশক৷ তেওঁৰ সন্মানাৰ্থে আজি হাৰিয়ানাৰ বালালী গাঁৱত এক কাৰ্যসূচীৰ আয়োজন কৰা হৈছে৷ বিনেশক খাপ পঞ্চায়ত আৰু সামাজিক সংগঠনসমূহে সোণৰ পদক বিজয়ী হিচাপে সন্মানিত কৰিব। গাওঁখনত দুদিন পূৰ্বৰ পৰাই অনুষ্ঠানৰ বাবে প্ৰস্তুতি চলি আছে। অনুষ্ঠানলৈ অহা অতিথিসকলক দেশী ঘিউৰ ব্যঞ্জন পৰিৱেশন কৰা হ’ব।