ডিজিটেল ডেস্কঃ কলকাতাৰ আৰ জি কৰ মেডিকেল কলেজৰ এগৰাকী প্ৰশিক্ষাৰ্থী মহিলা চিকিৎসকৰ সৈতে সংঘটিত জঘণ্য কাণ্ডক লৈ দেশজুৰি অব্যাহত আছে প্ৰতিবাদৰ জোৱাৰ। এই ঘটনাৰ ন্যায় বিচাৰি দেশৰ বিভিন্ন প্ৰান্তৰ চিকিৎসকসকলে ৰাজপথলৈ ওলাই অহা পৰিলক্ষিত হৈছে। এইমছ আৰু দিল্লীৰ অন্যান্য চিকিৎসালয়ৰ আৱাসী চিকিৎসক সকলেও সোমবাৰৰ পৰা নিৰ্মান ভৱনত স্বাস্থ্য মন্ত্ৰালয়ৰ সন্মুখৰ পথত বিনামূলীয়াকৈ অ’পিডি সেৱা প্ৰদান কৰাৰ কথা ঘোষণা কৰিছে।

একে সময়তে এই বিষয়ত অব্যাহত আছে ৰাজনীতিও। কলকাতা কাণ্ডৰ ব্যৰ্থতা স্বীকাৰ কৰি পশ্চিম বংগৰ মমতা বেনাৰ্জীৰ পদত্যাগ দাবী জনাই আহিছে বিজেপিয়ে। ইয়াৰ উপৰিও কলকাতাৰ আৰ জি কৰ মেডিকেল কলেজ এণ্ড হস্পিতালত সংঘটিত হোৱা জঘন্য অপৰাধৰ প্ৰতি উচ্চতম ন্যায়ালয়ে স্বতঃ সংজ্ঞান লৈছে। এই গোচৰত অহা ২০ আগষ্টত শুনানি গ্ৰহণ কৰিব সৰ্বোচ্চ ন্যায়ালয়ে। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত এখন বিচাৰপীঠে শুনানি গ্ৰহণ কৰিব।

ইফালে আজি মুম্বাইৰ আজাদ ময়দানত কলকাতা কাণ্ডৰ বিৰুদ্ধে প্ৰতিবাদ সাব্যস্ত কৰে চিকিৎসক আৰু স্থানীয় ৰাইজে। ইয়াৰ বিপৰীতে জানিব পৰা মতে, বংগৰ পৰিস্থিতি সন্দৰ্ভত প্ৰতিবেদন দাখিল কৰিবলৈ আজি দিল্লীত উপস্থিত হ’ব পশ্চিম বংগৰ ৰাজ্যপাল চি ভি আনন্দ বসু। সূত্ৰ অনুসৰি তেওঁ দিল্লীত কেন্দ্ৰীয় গৃহমন্ত্ৰী অমিত শ্বাহ আৰু স্বাস্থ্যমন্ত্ৰী জে পি নাড্ডাক সাক্ষাৎ কৰিব।