মুখ্যমন্ত্ৰী বিমন্ত বিশ্ব শৰ্মাৰ কেবিনেটে গোমাংস নিষিদ্ধ কৰাৰ ঘোষণাৰ পিছতে সপক্ষে-বিপক্ষে প্ৰতিক্ৰিয়া প্ৰকাশ কৰি গৈছে দল-সংগঠনে৷ বিৰোধী বামপন্থী দল চিপিআইএমৰ ৰাজ্যিক এই সিদ্ধান্তক তীব্ৰ নিন্দা কৰিছে৷ চিপিআইএমে এক বিবৃতি যোগে কয় যে সকলোৰে জ্ঞাত যে অসমত পূৰ্বৰে পৰা বুজন সংখ্যক মুছলমানধৰ্মী লোক সংখ্যাগুৰু হিন্দুধৰ্মী লোকৰ সৈতে ওচৰা-ওচৰিকৈ বসবাস কৰি আহিছে৷ পাৰস্পৰিক সন্মান আৰু শান্তি-সম্প্ৰীতিৰে বসবাস কৰি অহা বিভিন্ন ধৰ্মাৱলম্বী লোকৰ মাজত খাদ্যক লৈ অশান্তি আৰু সংঘাতৰ ইতিহাস ৰাজ্যখনত নাই৷ কিন্তু বিষাক্ত সাম্প্ৰদায়িক ৰাজনীতিৰে পৰিচালিত বিজেপিয়ে ধৰ্মীয় মেৰুকৰণৰ লক্ষ্যৰে খাদ্যাভাসক ৰাজনীতিৰ বিষয় কৰি লৈ সাম্প্ৰদায়িক সংঘাত সৃষ্টিৰ বাবে ধাৰাবাহিকভাৱে প্ৰচেষ্টা চলাই আহিছে৷ এই লক্ষ্যৰেই অসম গো-সংৰক্ষণ আইন, ২০২১ প্ৰণয়ন কৰিছে৷ অথচ মুখ্যমন্ত্ৰীসহ বিজেপি নেতৃত্বই ভালকৈয়ে জানে যে অসমৰ বাস্তৱতাত এই আইন সম্পূৰ্ণভাৱে প্ৰয়োগ সম্ভৱেই নহয়৷ কাৰণ আইনখনত থকাৰ দৰে গৰুৰ কিনা-বেচা বন্ধ কৰিলে হিন্দু-মুছলমান গো-পালক সকলোৱে সাংঘাতিকধৰণে ক্ষতিগ্ৰস্ত হ’ব৷ কেৱল সাম্প্ৰদায়িক উত্তেজনা বৃদ্ধিৰ স্বাৰ্থত এই আইন ঢাক-ঢোল বজাই প্ৰণয়ন কৰিলে৷ এতিয়া ৰাজহুৱা স্থানত আৰু সামাজিক অনুষ্ঠানত গো-মাংস নিষিদ্ধ কৰাৰ ঘোষণা হ’ল এই জঘন্য ৰাজনীতিকে আগবঢ়াই নিয়াৰ বাবে লোৱা প্ৰচেষ্টাৰে অংশবিশেষ৷ চিপিআইএমৰ ৰাজ্যিক কমিটিয়ে অসমৰ বিজেপি চৰকাৰৰ এনে বিপজ্জনক, প্ৰৰোচনামূলক আৰু সংঘাতকামী পদক্ষেপৰ তীব্ৰ নিন্দা কৰিছে৷ মুখ্যমন্ত্ৰীৰ ঘোষণাৰ দ্বাৰা ৰাজ্যখনৰ জনসংখ্যাৰ প্ৰায় ৩৮ শতাংশ বা ১ কোটি ২০ লাখ মুছলমান আৰু খ্ৰীষ্টানধৰ্মী লোকৰ সাংবিধানিক অধিকাৰৰ ওপৰত চৰম আঘাত হানিছে৷ বিজেপি চৰকাৰে দৰাচলতে খাদ্যাভ্যাসক অপৰাধ হিচাপে চিহ্নিত কৰাৰ অপচেষ্টা কৰিছে৷ চিপিআইএমৰ ৰাজ্যিক কমিটিয়ে বিজেপি চৰকাৰৰ এনে চৰম সাম্প্ৰদায়িক আৰু ফেচীবাদী সিদ্ধান্তক তীব্ৰ গৰিহণা দিছে৷