বৰপেটাৰোড প্ৰেছ ক্লাৱৰ সভাপতি তথা বৰপেটাৰ জ্যেষ্ঠ সাংবাদিক জয়ন্ত দাসৰ আজি বিয়োগ ঘটে। বৰপেটা মেডিকেল কলেজত চিকিৎসাধীন অৱস্থাত জয়ন্ত দাসে ইহলীলা সম্বৰণ কৰে। সমাজসেৱী তথা সাংবাদিক জয়ন্ত দাস দীৰ্ঘদিন ধৰি এক জটিল ৰোগত আক্ৰান্ত হৈ আছিল। এসময়ৰ বজালী কলেজৰ অত্যন্ত মেধা সম্পন্ন ছাত্ৰ আছিল জয়ন্ত দাস। অসম সাহিত্য সভাৰ মিডিয়া কোষৰ দায়িত্ববাহী, বৰপেটাৰোড সাহিত্য সভাৰ সম্পাদক, নাট্য সন্মীলনৰ বৰপেটাৰোড শাখাৰ সভাপতি, বৰপেটাৰোড ৰাস মহোৎসৱ উদযাপন সমিতিকে ধৰি বহু সামাজিক অনুষ্ঠান-প্ৰতিষ্ঠানৰ সৈতে জড়িত আছিল সাংবাদিক দাস। উচ্চ শিক্ষা বজালী মহাবিদ্যালয়ৰ পৰা আৰম্ভ কৰি পিছত অসম বয়ন শিল্প প্ৰতিষ্ঠানৰ পৰা কাৰিকৰী শিক্ষা সাং কৰি সুদুৰ মুম্বাইত নিজকে প্ৰতিষ্ঠা কৰিবলৈ তেওঁ যত্ন কৰিছিল। দাসৰ মৃত্যুত সমগ্ৰ বৰপেটা জিলাৰ লগতে ৰাজ্যখনত শোকৰ ছাঁ পৰে। বিভিন্ন দল-সংগঠন শোক প্ৰকাশ কৰিছে।

বজালী কলেজৰ ১৯৮৫ৰ প্ৰাক্তন ছাত্ৰ-ছাত্ৰী সংস্থা গঠন কৰি নিজে সম্পাদকৰ দায়িত্ব লৈ কেইবাবাৰ মিলন সমাৰোহ অনুষ্ঠিত কৰিছে। এক গধুৰ দায়িত্ব কান্ধ পাতি লৈ সকলোৰে প্ৰিয়ভাজন হৈ পৰিছিল।  স্বাধীনচেতীয়া মন এটা লৈ অসমলৈ উভটি আহি জে কে গাৰ্মেন্ট নামৰ এটি বস্ত্ৰ উদ্যোগ গঢ়ি তুলিছিল যদিও প্ৰতিযোগিতামুলক বজাৰত নিজকে প্ৰতিষ্ঠা কৰিব নোৱাৰিলে। বিকল্প পথৰ সন্ধানেৰে নিজক সংবাদ সেৱাত নিয়োজিত কৰি এক নতুন পৰিচয়ৰে আগবাঢ়ি গৈছিল। জীৱনৰ বহু ঘাট-প্ৰতিঘা নেওচি সামজিক কামত নিজৰ সক্ৰিয়তাৰে এক নতুন পৰিচয় দিবলৈ সক্ষম হৈছিল।