নলবাৰী জিলা টিহুত স্কুটীসহ পথৰ দাঁতিৰ নলাত পৰি ১৫ বছৰীয়া ছাত্ৰীয়ে অকাল মৃত্যুক আকোৱালি লোৱাত চাঞ্চল্যৰ সৃষ্টি হৈছে৷ টিহুৰ শংকৰদেৱ শিশু নিকেতনৰ ভাস্বতী কলিতাৰ মৃত্যু হয়৷ ভাস্বতী কলিতাৰ বয়স প্ৰায় ১৫ বছৰ আৰু নৱমমান শ্ৰেণীত পঢ়ি আছিল৷ জানিব পৰা মতে, টিহুৰ ৰণাকুছি হেলচাপাৰাৰ ঘৰৰ পৰা এএছ-১৪-এন-১১০২ নম্বৰৰ স্কুটীত ৩নং ৱাৰ্ডৰ মাজেৰে টিউচনলৈ গৈ আছিল ভাস্বতী৷ ৩নং ৱাৰ্ডত হঠাতে স্কুটীখনৰ নিয়ন্ত্ৰণ হেৰুৱাই স্কুটীসহ পথৰ দাঁতিৰ নলাত পৰে৷ নলাৰ পকী দেৱালত লাগি ভাস্বতীয়ে দেহৰ কেইবাটা অংশত বেয়াকৈ আঘাত পায়৷ স্থানীয় লোকে নলাৰ পৰা তুলি ততাতৈয়াকৈ ভাস্বতীক নলবাৰীৰ এখন ব্যক্তিগত খণ্ডৰ চিকিৎসালয়ত ভৰ্তি কৰে যদিও চিকিসকে মৃত ঘোষণা কৰে৷ ৰণাকুছি হেলচাপাৰা’ৰ বাপন কলিতাৰ কন্যা আছিল ভাস্বতী৷ ছাত্ৰীগৰাকীৰ মৃত্যুৰ খবৰে তীব্ৰ চাঞ্চল্যৰ সৃষ্টি কৰিছে৷ ইপিনে অভিভাৱকক লৈ কেইবাটাও প্ৰশ্ন উত্থাপন হৈছে৷ নৱমমান শ্ৰেণীত অধ্যয়নৰত আৰু মাথো ১৫ বছৰ বয়সত স্কুটী চলাব দিছিল কিয়? অভিভাৱকৰ ভুলৰ বাবে এগৰাকী ছাত্ৰীয়ে মৃত্যুক আকোৱালি ল’বলগীয়া হোৱা বুলি বিভিন্নজনে আক্ষেপ প্ৰকাশ কৰিছে৷ আনহাতে টিহু আৰক্ষীৰ তৎপৰতাক লৈও প্ৰশ্ন উত্থাপন হৈছে৷