লোকসভা নিৰ্বাচনৰ পাছতে বিজেপিয়ে দলটোৰ নেতাসকলক ৰাজনৈতিক সংস্থাপন দিবলৈ প্ৰয়াস কৰিছে৷ বিশেষকৈ অসমৰ নাৰাজ জ্যেষ্ঠ নেতাসকলক সংস্থাপিত কৰিবলৈ প্ৰয়াস কৰিছে৷ অসমৰ বিজেপিৰ নাৰাজ জ্যেষ্ঠ নেতা ৰমেন ডেকাক ছত্তীছগড়ৰ ৰাজ্যপাল নিয়ুক্তি দিছে কেন্দ্ৰীয় চৰকাৰে৷ মঙলদৈ সংসদীয় সমষ্টিৰ দুবাৰৰ সাংসদ ৰমেন ডেকাক দলে বঞ্চিত কৰাৰ অভিযোগ উত্থাপন হৈ আহিছে৷ সময়ে সময়ে দলৰ পুৰণি কৰ্মীক বঞ্চিত কৰাৰ অভিযোগৰ মাজতে ৰমেন ডেকাক ছত্তীছগড়ৰ ৰাজ্যপাল নিয়ুক্তি দিয়া হৈছে৷ ৰমেন ডেকা বৰ্তমান ৰাজ্য চৰকাৰৰ ৰাজ্যিক উদ্ভাৱন আৰু ৰূপান্তৰ আয়োগৰ উপাধ্যক্ষ আছিল।

২০০৯ চন আৰু ২০১৯ চনত মঙলদৈ সংসদীয় সমষ্টিত জয়ী হৈছিল যদিও বিগত ৫টা বছৰে দলত স্থিতি দুৰ্বল আছিল ৰমেন ডেকাৰ৷ দলে টিকট নিদিয়াৰ লগতে দলীয় কাম-কাজৰ পৰা আতৰি আছিল৷ ৰমেন ডেকা অসমৰ অতি পুৰণি বিজেপি নেতা৷ দলটোৰ গণভিত্তি নথকাৰ সময়ত অসমত কাম কৰিছিল। বিজেপিৰ ৰাজ্যিক সভাপতি হিচাপে কাৰ্যনিৰ্বাহ কৰিছিল৷ ১৯৮০ত ভাৰতীয় জনতা পাৰ্টীৰ গঠনৰ সময়ত ৰমেন ডেকা সদস্য আছিল। ১৯৭৭ চনত ৰমেন ডেকাই জনসংঘৰ অসম শাখাৰ সাধাৰণ সম্পাদকৰ দায়িত্ব লাভ কৰিছিল। দলৰ অসমৰ মুখপাত্ৰ, ৰাজ্যিক সাধাৰণ সম্পাদক, ৰাজ্যিক উপ-সভাপতি আৰু ২০০৫ চনৰ পৰা ২০০৯ চনলৈ ৰাজ্যিক সভাপতি আছিল ৰমেন ডেকা। ৭০ বছৰীয়া ৰমেন ডেকা বিজেপি গঠনৰ সময়তে দিল্লীত উপস্থিত থকা অসমৰ নেতা৷