হাৰিয়ানাৰ এগৰাকী মহিলা ইউটিউবাৰকে ধৰি ৬ জন লোকক গ্ৰেপ্তাৰ কৰিছে। অভিযোগ অনুসৰি, তেওঁলোক সকলোৱে পাকিস্তানী চোৰাংচোৱা সংস্থাৰ গুপ্তচৰ হিচাপে কাম কৰিছিল। ভাৰতৰ পৰা গোপন তথ্য সৰবৰাহৰ বিনিময়ত তেওঁলোকে সীমান্তৰ সিপাৰৰ পৰা লাভ কৰিছিল বিপুল পৰিমাণৰ ধন। আৰক্ষী সূত্ৰৰ পৰা জানিব পৰা মতে, গ্ৰেপ্তাৰ হোৱা লোকসকলৰ ভিতৰত অন্যতম হৈছে হাৰিয়ানাৰ জ্যোতি মালহোত্ৰা। ট্ৰেভেল ব্লগাৰ হিচাপে পৰিচিত এইগৰাকী মহিলা যদিও ইউটিউবত সক্ৰিয়, কিন্তু প্ৰকৃত পৰিচয় তেওঁৰ ভিন্ন। পাকিস্তান উচ্চায়ুক্তৰ সদস্য এহছান উৰ ৰহিম ওৰফে ডানিছৰ ঘনিষ্ঠ আছিল জ্যোতি। ডানিছৰ সহায়ত ২০২৩ চনত জ্যোতিয়ে ভিছা লৈ পাকিস্তান ভ্ৰমণ কৰিছিল। যোৱা মঙলবাৰে কেন্দ্রই এই ডানিছ নামৰ লোকজনক ‘অবাঞ্চিত ব্যক্তি’ বুলি ঘোষণা কৰি ভাৰতৰ পৰা বহিষ্কাৰ কৰে৷ তদন্তত প্ৰকাশ পাইছে যে পাকিস্তানৰ একাধিক লোকৰ সৈতে যোগাযোগ আছিল ইউটিউবাৰ জ্যোতিৰ। কেৱল ডানিছৰ সৈতেই নহয়, পাকিস্তান চোৰাংচোৱা অপাৰেটিভ (পিআইঅ’)ৰ সৈতেও আছিল হাৰিয়ানাৰ এই মহিলা ইউটিউবাৰগৰাকীৰ যোগাযোগ। হোৱাটছএপ, টেলিগ্ৰাম, স্নেপচ্যাটৰ দৰে প্লেটফৰ্মত তথ্য বিনিময়ৰ কামত জড়িত আছিল। আনকি জ্যোতিয়ে পাকিস্তানী চোৰাংচোৱা ছাকিৰ ওৰফে ৰানা শ্বাহবাজৰ নম্বৰো নিজৰ ফোনত ‘জাথ ৰন্ধাৱা’ নামেৰে চেভ কৰি ৰাখিছিল। জ্যোতিৰ উপৰিও আন কেইবাজনো ভাৰতীয়ৰো পাকিস্তানৰ সৈতে সম্পৰ্ক পোহৰলৈ আহিছে। একেটা গোচৰতে গ্ৰেপ্তাৰ হোৱা পঞ্জাৱৰ বাসিন্দা গুজালা নামৰ এগৰাকী ৩২ বৰ্ষীয় মহিলাও তদন্তকাৰীৰ জালত পৰে। চলিত বৰ্ষৰ ২৭ ফেব্ৰুৱাৰীত তেওঁ পাকিস্তানলৈ গৈছিল। ডানিছেই ব্যৱস্থা কৰিছিল তেওঁৰ বাবে ভিছাৰ। গুজলাৰ লগত তেওঁৰ ঘনিষ্ঠতা ইমানেই প্ৰবল আছিল যে ডানিছে বিয়া কৰোৱাৰ প্ৰতিশ্ৰুতি দিছিল মহিলাগৰাকীক। নিয়মীয়াকৈ ধনৰ লেনদেন হৈছিল, প্ৰতিবাৰেই ১০ হাজাৰৰ পৰা ২০ হাজাৰ টকা গুজলালৈ প্ৰেৰণ কৰা হৈছিল। পাকিস্তান ভ্ৰমণৰ অন্তত বানু নাছৰিনা আৰু আন এগৰাকী মহিলাৰ সৈতে ২৩ এপ্ৰিলত পাকিস্তান উচ্চায়ুক্তত হাজিৰ হৈছিল গুজালা। খবৰ অনুসৰি ডানিছেই তেওঁলোকক ভিছা প্ৰদান কৰিছিল। তদন্তত গ্ৰেপ্তাৰ হোৱা আন অভিযুক্তসকলৰ ভিতৰত আছে পঞ্জাৱৰ মালেৰকোটলাৰ ইয়ামিন মহম্মদ, হাৰিয়ানাৰ কাইথালৰ দেৱীন্দৰ সিং ধিলন (শিখ ছাত্ৰ নেতা) আৰু হাৰিয়ানাৰ নুহ অঞ্চলৰ আৰমান। চোৰাংচোৱা বিষয়াসকলে দাবী কৰিছে যে তেওঁলোকৰ প্ৰত্যেকেই পাকিস্তানৰ সৈতে প্ৰত্যক্ষভাৱে জড়িত আছিল আৰু দেশৰ পৰা গোপন তথ্য সৰবৰাহৰ কামত জড়িত আছিল।