২৯ অক্টোবৰত লামডিং বনাঞ্চলৰ অন্তৰ্গত নখুঁটি বীটৰ বনকৰ্মীয়ে মহিলাৰ দলৰ ওপৰত গুলী চলোৱাত খুদেজা খাতুন নামৰ মহিলাএগৰাকী গুৰুতৰভাৱে আহত হয়৷ চিপিআইএমৰ অসম ৰাজ্যিক কমিটিয়ে এই পাশৱিক ঘটনাক তীব্ৰ নিন্দা কৰিছে৷ লামডিং বনাঞ্চলৰ লগত সংলগ্ন নখুঁটিৰ ২ নং দেবেন গাঁৱৰ দুখীয়া মহিলাসকলে বনাঞ্চলত পৰি থকা খৰি নিয়মিত বুটলি ৰন্ধন কাৰ্যত ব্যৱহাৰ কৰে। ২৯ অক্টোবৰত আঠগৰাকী মহিলাই অইন দিনাৰ দৰে সিদিনাখনো বনাঞ্চলত পৰি থকা খৰি বুটলিবলৈ যায়৷ মহিলা দলটোৰ ওপৰত বনকৰ্মীয়ে বিনা প্ৰৰোচনাত যধে-মধে গুলীচালনা কৰে৷ গুলীচালনাৰ ফলত খুদেজা খাতুন নামৰ প্ৰায় ৪০ বছৰ বয়সীয়া এগৰাকী দুখীয়া পৰিয়ালৰ মহিলা গুৰুতৰভাৱে আহত হয়৷ প্ৰথম অৱস্থাত স্থানীয় চিকিৎসালয়ত ভৰ্তি কৰোৱা হৈছিল যদিও গুৰুতৰ আঘাতলৈ লক্ষ্য ৰাখি বৰ্তমান গুৱাহাটীৰ দিছপুৰ হাস্পতালত ভৰ্তি কৰোৱা হৈছে৷ চিপিআইএমৰ অসম ৰাজ্যিকে বনবিভাগৰ এনে বেআইনী আৰু আসুৰিক ভূমিকাক তীব্ৰ নিন্দা কৰিছে আৰু ঘটনাৰ বাবে দায়ীসকলক গ্ৰেপ্তাৰ কৰি কঠোৰ শাস্তি দিবলৈ দাবী জনাইছে৷ লামডিং বনাঞ্চলত বনবিভাগৰ অসাধু বিষয়া-কৰ্মচাৰীয়ে চোৰাং কাৰবাৰীৰ সৈতে জড়িত হৈ বনাঞ্চল ধ্বংসত লিপ্ত হৈ আছে৷ অথচ বনাঞ্চলৰ কোনো হানি নকৰাকৈ খৰি বুটলিবলৈ যোৱা স্থানীয় দুখীয়া নিৰীহ মহিলাৰ ওপৰত নিৰ্বিচাৰে গুলি চলাইছে৷ এইদৰেই ৰাজ্যত চলিছে অৰাজকতা, আইন-শৃংখলাহীনতা আৰু স্বৈৰাচাৰী শাসন। চিপিআইএমে আহত মহিলাগৰাকীৰ চিকিৎসাৰ সম্পূৰ্ণ খৰচ বহন কৰা আৰু উপযুক্ত ক্ষতিপূৰণ দিয়াৰ লগতে দোষী বনকৰ্মী তথা বিষয়াৰ বিৰুদ্ধে কঠোৰ শাস্তিমূলক ব্যৱস্থা গ্ৰহণ কৰিবলৈ চৰকাৰৰ ওচৰত দাবী জনাইছে।