উপ-নিৰ্বাচনৰ বাব তৎপৰতা আৰম্ভ কৰিছে অসম প্ৰদেশ কংগ্ৰেছে৷ ইতিমধ্যে ৫ সমষ্টিৰ উপ-নিৰ্বাচনৰ বাবে সুকীয়া সুকীয়া সমিতি গঠন কৰিছে প্ৰদেশ কংগ্ৰেছে৷ বঙাইগাঁও, চামগুৰি, ধলাই, বিহালী আৰু ছিদলী বিধানসভা সমষ্টিৰ বাবে তিনি সাংসদ আৰু আন দুই নেতাক লৈ ৫টা সমিতি গঠন কৰিছে কংগ্ৰেছে৷

প্ৰতিটো সমিতিত আছে ৫জনকৈ সদস্য৷ এই সমিতিসমূহে উপ-নিৰ্বাচন অনুষ্ঠিত হ’বলগীয়া সমষ্টিত কমেও এমাহে কাম কৰিব লাগিব৷ ব্লক, মণ্ডল, বুথ সমিতি, ছ’চিয়েল মিডিয়া পৰিচালনা, পোলিং এজেণ্টৰ সৈতে কাম কৰি সমষ্টিত গণভিত্তি সবল কৰিব লাগিব৷

৫টা সমিতিয়ে উপ-নিৰ্বাচনৰ ভোটগ্ৰহণ নোহোৱা পৰ্যন্ত ১৫ দিনৰ মূৰকত প্ৰদেশ কংগ্ৰেছৰ সভাপতি, নিখিল ভাৰত কংগ্ৰেছক অগ্ৰগতিৰ তথ্য দাখিল কৰি থাকিব লাগিব।

বঙাইগাওঁ বিধানসভা সমষ্টিৰ বাবে গঠিত সমিতিত বিধায়ক জাকিৰ হুছেইন শিকদাৰ, ৰাজ্যিক উপ-সভানেত্ৰী ববিতা শৰ্মা, সাধাৰণ সম্পাদক প্ৰদ্যুৎ ভূঞা, আনোৱাৰ আহমেদ আৰু সম্পাদক অমৃত বাদশ্বাহক ৰখা হৈছে।

ধলাই সমষ্টিৰ বাবে গঠিত সমিতিত প্ৰাক্তন মন্ত্ৰী অজিত সিং, ৰাজ্যিক উপ-সভাপতি অৰুণ দত্ত মজুমদাৰ, সাধাৰণ সম্পাদক আনোৱাৰ হুছেইন, স্বপন মণ্ডল আৰু আমিনুৰ ৰছিদ চৌধুৰীক ৰখা হৈছে৷

বিহালী বিধাসনভা সমষ্টিৰ বাবে গঠিত সমিতিত সাংসদ প্ৰদ্যুৎ বৰদলৈ, প্ৰাক্তন সাংসদ ৰাম প্ৰসাদ শৰ্মা, ৰাজ্যিক সমিতিৰ কোষাধ্যক্ষ হেম হৰি পেগু, সাধাৰণ সম্পাদক প্ৰেমলাল গঞ্জু আৰু সঞ্জু বৰুৱাক ৰখা হৈছে।

ছিদলী সমষ্টিৰ বাবে গঠিত সমিতিত সাংসদ গৌৰৱ গগৈ, ৰাজ্যিক উপ-সভাপতি নৱজ্যোতি তালুকদাৰ, সাধাৰণ সম্পাদক গৰ্জন মুছাহাৰী, খালিলুৰ ৰহমান আৰু কনদৰ্প কলিতাক ৰখা হৈছে।

চামগুৰি বিধানসভা সমষ্টিৰ বাবে গঠিত সমিতিত সাংসদ ৰকিবুল হুছেইন, ৰাজ্যিক উপ-সভাপতি নৃপেন্দ্ৰ ঠাকুৰীয়া, উপ-সভাপতি নাছিৰ খান, সাধাৰণ সম্পাদক বিতুপন শইকীয়া আৰু সম্পাদক ৰেহান উদ্দিন আহমেদক ৰখা হৈছে।