গৃহ বিভাগৰ এটা সূত্ৰৰ উধৃতি দি ৰাষ্ট্ৰীয় সংবাদমাধ্যমত প্ৰকাশিত খবৰ অনুসৰি মণিপুৰত চলিব ‘অপাৰেশ্যন অল আউট একশ্যন প্লেন’৷ এই অভিযান ২৪ ঘণ্টাৰ ভিতৰত কাৰ্যকৰী হোৱাৰ সম্ভাৱনা আছে৷ এই অভিযানত উগ্ৰপন্থী, উগ্ৰপন্থীৰ গোটৰ সমৰ্থক, অস্ত্ৰ যোগানধাৰী লক্ষ্য কৰি লোৱা হ’ব৷ এই অভিযানত অত্যন্ত কঠোৰ হ’ব পাৰে অৰ্ধসামৰিক বাহিনী৷ অভিযানৰ নেতৃত্ব দিব চিআৰপিএফে৷ কিন্তু ৰাজ্যিক আৰক্ষী আৰু অন্যান্য অৰ্ধসামৰিক বাহিনীয়ে সহায় কৰিব চিআৰপিএফক৷ কেন্দ্ৰীয় গৃহমন্ত্ৰী অমিত শ্বাহে বিশেষ জৰুৰী বৈঠকৰ পাছতে এই সিদ্ধান্ত লয়৷ কিন্তু শ্বাহৰ বৈঠকলৈ আমন্ত্ৰণ জনোৱা হোৱা নাছিল মণিপুৰৰ মুখ্যমন্ত্ৰী এন বিৰেন্দ্ৰ সিঙক৷ অস্থিৰ পৰিস্থিতিৰ মাজতে মুখ্যমন্ত্ৰীয়ে বিসম্বাদ কৰাৰ লগতে বিজেপিৰ কুকি বিধায়সকলে বিসম্বাদ কৰিব নেকি বুলি প্ৰশ্ন উত্থাপন হৈছে৷ মুখ্যমন্ত্ৰীক কেন্দ্ৰীয় গৃহমন্ত্ৰীয়ে বৈঠকলৈ আমন্ত্ৰণ জনোৱা নাই৷ মুখ্যমন্ত্ৰী সিঙৰ পৰা ফলৰি কাটিছে কুকি বিধায়সকল৷ কিয়নো খোদ মুখ্যমন্ত্ৰীয়ে আহ্বান জনোৱা বৈঠকলৈ নাহিল ১১ কুকি বিধায়ক৷ সোমবাৰে নিশা মুখ্যমন্ত্ৰীৰ চৰকাৰী আৱাসত অনুষ্ঠিত কৰা হয় বিধায়কৰ জৰুৰি বৈঠক৷ বিধায়ক উপস্থিত নথকাৰ কাৰণতহে মুখ্যমন্ত্ৰী এন বিৰেন সিঙৰ বৈঠক চৰ্চালৈ আহিছে৷ বৈঠকত শাসকপক্ষত থকা ৪৫ গৰাকী বিধায়কৰ ভিতৰত ১৮জন বিধায়ক অনুপস্থিত আছিল। তাৰে এজন হৈছে মন্ত্ৰী। দুদিন পূৰ্বে বিজেপিৰ মিত্ৰদল নেচনেল পিপলছ পাৰ্টিয়ে চৰকাৰৰ পৰা সমৰ্থন প্ৰত্যাহাৰ কৰিছিল। এনপিপিৰ এই ৭ বিধায়কো বৈঠকত উপস্থিত নাছিল৷ অসুস্থতাৰ উদ্ধৃতি দি বিধায়ক উপস্থিতি নথকাত চৰকাৰৰ বৰ্তি থাকিব নে নাই তাকে লৈ চৰ্চা হ’ব ধৰিছে৷ অনুপস্থিত বিধায়কৰ ভিতৰত ১০ জনেই কুকি বিধায়ক৷ মুখ্যমন্ত্ৰীৰ বৈঠক বয়কট কৰা মন্ত্ৰীসহ ১১ বিধায়কক কাৰণ দৰ্শোৱাৰ জাননী প্ৰেৰণ কৰা হৈছে৷ কিন্তু বৈঠকত পৰিস্থিতি নিয়ন্ত্ৰণত ব্যৰ্থ এন বীৰেন সিঙে বৈঠকত সংঘাত ৰোধৰ বাবে কেইবাটাও গুৰুত্বপূৰ্ণ সিদ্ধান্ত লয়। মণিপুৰত পুনৰ সশস্ত্ৰ বাহিনীৰ বিশে, ক্ষমতা আইন জাপি নিদিবলৈ কেন্দ্ৰক আহ্বান জনায়৷ এই সম্পৰ্কত কেন্দ্ৰক পুনৰীক্ষণৰ আহ্বান জনোৱাৰ প্ৰস্তাৱ লয় বৈঠকে। কেন্দ্ৰীয় গৃহ মন্ত্ৰণালয়ৰ সিদ্ধান্তক পুনৰীক্ষণৰ বাবে আবেদন জনাব। জিৰিবামৰ কেঁচুৱাসহ ছয় মহিলাক হত্যা কৰাত কুকি উগ্ৰপন্থীকে জগৰীয়া কৰি ৭ দিনৰ ভিতৰত কুকি উগ্ৰপন্থীক অবৈধ ঘোষণা কৰাৰো প্ৰস্তাৱ গ্ৰহণ কৰে বৈঠকে। ইপিনে আজি কংগ্ৰেছৰ সাধাৰণ সম্পাদক জয়ৰাম ৰমেশৰ নেতৃত্বত অৰুণাচলৰ প্ৰাক্তন মুখ্যমন্ত্ৰী নবাম টুকি, মণিপুৰ কংগ্ৰেছৰ সভাপতি কেইশাম মেঘাচন্দ্ৰ, মণিপুৰৰ সাংসদ এ বিমোল আকোইজাম, এআইচিচিৰ কাৰ্যবাহী সদস্য নিঙ্গোমবাম ভূপেন্দ্ৰ মেইটেয়ে কংগ্ৰেছৰ ৰাষ্ট্ৰীয় সভাপতি মল্লিকাৰ্জন খাৰ্গেক সাক্ষাৎ কৰে৷ মণিপুৰৰ শেহতীয়া পৰিস্থিতিক লৈ আলোচনাত মিলিত হৈ প্ৰতিনিধি দলটোৱে মণিপুৰৰ শেহতীয়া পৰিস্থিতিৰ বিষয়ে খাৰ্গেক অৱগত কৰে৷