বাংলাদেশী যুৱতীক গুৱাহাটীৰ হোটেলৰ কোঠাত আৱদ্ধ কৰি অনৈতিক কাৰ্যত লিপ্ত হ’বলৈ বাধ্য কৰোৱাৰ ঘটনা পোহৰলৈ অহাত সমগ্ৰ গুৱাহাটীত তীব্ৰ প্ৰতিক্ৰিয়াৰ সৃষ্টি হৈছে৷ গুৱাহাটীৰ দিছপুৰ লাষ্টগেটৰ হোটেল আদিত্য পেলেচত এই ঘটনা সংঘটিত হোৱা বুলি জানিব পৰা গৈছে৷ ইতিমধ্যে বাংলাদেশী যুৱতীক হোটেলৰ কোঠাত বন্দী কৰি শোষণৰ প্ৰয়াস কৰাৰ অভিযোগত ছয় যুৱকক গ্ৰেপ্তাৰ কৰিবলৈ সক্ষম হৈছে গুৱাহাটী আৰক্ষীয়ে৷ বকোৰ জাহাংগীৰ আলম, ছফিকুল হক, মোল্লা জাহাংগীৰ, বৰপেটাৰ ছাদ্দাম হুছেইন, ছফিকুল ইছলাম, চুৰত জামালক আৰক্ষীয়ে গ্ৰেপ্তাৰ কৰি সোধ-পোছ অব্যাহত ৰাখিছে৷ জানিব পৰা মতে, এগৰাকী বাংলাদেশী যুৱতীৰ নামত হোটেল আদিত্য পেলেচত কোঠা ভাড়া কৰিছিল হাতীগাঁৱৰ জাকিৰ নামৰ যুৱকে৷ জাকিৰে যুৱতীৰ নামত ভুৱা আধাৰ কাৰ্ড তৈয়াৰ কৰি ১০১ আৰু ১০২ নং কোঠা দুটা হোটেলৰ কোঠা বুকি কৰিছিল বুলিও জানিব পৰা গৈছে৷ জাকিৰে বিদেশী যুৱতীৰ ৭ হাজাৰ টকাৰ বিনিময়ত গ্ৰেপ্তাৰ হোৱা ৬ যুৱকৰ হাতত তুলি দিছিল৷ ৬ যুৱকে লগলাগি হোটেলৰ কোঠাতে যুৱতীৰ সৈতে অপকৰ্ম সংঘটিত কৰাৰ প্ৰয়াস কৰে৷ দলবদ্ধভাৱে শাৰীৰিক শোষণৰ প্ৰয়াস কৰাৰ লগতে সেই দৃশ্যসমূহ মোবাইলত ৰেকৰ্ড কৰে৷ বিদেশী যুৱতীগৰাকীক হোটেলৰ কোঠাত অনৈতিক কাৰ্যত লিপ্ত হোৱাৰ দৃশ্যসমূহ ৰেকৰ্ড কৰিছিল৷ যুৱতীয়ে মোবাইলৰ সন্মুখত সকলো কৰি যাবলৈ বাধ্য হৈছিল৷ কিন্তু যুৱতীয়ে কেনেবাকৈ চক্ৰবেহুৰ পৰা মুক্ত হৈ হোটেলৰ পৰা ওলাই আহি গুৱাহাটী আৰক্ষীৰ কাষ চাপে৷ বিদেশী যুৱতীগৰাকীয়ে আৰক্ষীৰ সন্মুখত সকলো কথা বৰ্ণানা কৰে। লগে লগে আৰক্ষীয়ে অভিযান আৰম্ভ হয়৷ অভিযানত জাহাংগীৰ, ছফিকুল, জাহাংগীৰ, ছাদ্দাম, ছফিকুল আৰু চুৰত জালত পৰে৷ অসম আৰক্ষীৰ অপৰাধ শাখাই অভিযান চলাই ছয়জন অভিযুক্তক গ্ৰেপ্তাৰ কৰাৰ লগতে আটাইকেইজনৰ পৰা মোবাইল ফোন জব্দ কৰিবলৈ সক্ষম হয়৷ জব্দকৃত মোবাইলত অপত্তিজনক দৃশ্যসমূহ মজুত থকা বুলি জানিব পৰা গৈছে৷ খবৰ মতে, হাতীগাঁৱৰ জাকিৰে ৭ হাজাৰ টকাৰ বিনিময়ত বাংলাদেশৰ ২২ বছৰীয়া যুৱতীগৰাকীক বকোৰ ছফিকুল হকৰ হাতত তুলি দিছিল। সিমানে নহয় ভুৱা আধাৰ কাৰ্ড তৈয়াৰ কৰি হোটেলৰ কোঠা বুক কৰিছিল। বিদেশী যুৱতী যোগান ধৰা জাকিৰ বৰ্তমান পলাতক যদিও জাকিৰক গ্ৰেপ্তাৰ কৰিবলৈ আৰক্ষীয়ে জাল পেলাইছে৷ বিদেশী যুৱতীগৰাকী কেনেকৈ গুৱাহাটীলৈ আহিল সেই কথা পোহৰলৈ আনিবলৈ তদন্ত আৰম্ভ কৰিছে গুৱাহাটী আৰক্ষীয়ে৷ লগতে এনেদৰে বিদেশী যুৱতী যোগান ধৰি চক্ৰটোৱে বেহা চলাই গৈছে নেকি তাক লৈও আৰক্ষীয়ে তদন্ত কৰিব বুলি জানিব পৰা গৈছে৷