গুৱাহাটীৰ ৰাজহুৱা সমাজকৰ্মী তথা ব্যৱসায়ী লুইত কুমাৰ বৰ্মনৰ বিৰুদ্ধে অসম মহিলা আয়োগত অভিযোগ প্ৰদান কৰিছে নলবাৰীৰ জিলা আয়ুক্ত বৰ্ণালী ডেকাই৷ নলবাৰীৰ জিলা আয়ুক্ত বৰ্ণালী ডেকাই অসম মহিলা আয়োগত অভিযোগ প্ৰদান কৰাত লুইত কুমাৰ বৰ্মনক শুনানিত উপস্থিত থাকিবলৈ তলব কৰিছে৷ অহা ২৫ ছেপ্টেম্বৰত ৰাজ্যিক মহিলা আয়োগৰ আইনী উপদেষ্টা সমিতিৰ ওচৰত হাজিৰ হ’ব লাগিব লুইত কুমাৰ বৰ্মন৷ এই বিষয়ত তীব্ৰ প্ৰতিক্ৰিয়া ব্যক্ত কৰিছে লুইত কুমাৰ বৰ্মনে৷ বৰ্মনে কয় ‘‘আদালতত বিচাৰাধীন বিষয় এটাৰ গোচৰ মহিলা আয়োগে ল’লে কেনেকৈ? এবাৰ হাৰি লাজ নাপালে৷ এইবাৰ আকৌ লাগিব আহিছে৷ মই এইবাৰ কঠোৰ হম, মই শপত খাইছো৷’’ ২০২৪ চনৰ মে’ মাহত অৰ্থাৎ লোকসভা নিৰ্বাচনৰ সময়ত নলবাৰীৰ জিলা আয়ুক্ত বৰ্ণালী ডেকাই গুৰুতৰ অভিযোগ উত্থাপন কৰিছিল৷ জিলা আয়ুক্ত বৰ্ণালী ডেকাই ধন দাবীৰ অভিযোগত নলবাৰী থানাত এজাহাৰ দাখিল কৰিছিল৷ লুইত কুমাৰ বৰ্মনৰ বিৰুদ্ধে আনিছিল এই অভিযোগ৷ নাম নোলোৱাকৈ বৰ্ণালী ডেকাৰ বিৰুদ্ধে লুইত কুমাৰ বৰ্মনে ছ’চিয়েল মিডিয়াত ভিন্ন কেলেংকাৰীৰ অভিযোগ উত্থাপন কৰি পোষ্ট দি আহিছিল৷ লোকসভা নিৰ্বাচনৰ দিনটোত গৰ্ডন স্কুলস্থিত ষ্ট্ৰং ৰুমত জিলা আয়ুক্তক লুইত কুমাৰ বৰ্মনৰ মানুহ বুলি পৰিচয় দিয়া এজন লোকে ১০ লক্ষ টকা দাবী কৰা বুলি অভিযোগ আনিছিল বৰ্ণালী ডেকাই৷ বৰ্ণালী ডেকাই নলবাৰী সদৰ আৰক্ষী থানাত এজাহাৰ দাখিল কৰাত সদৰ আৰক্ষী থানাত হাজিৰ হৈছিল লুইত কুমাৰ বৰ্মন৷ আৰক্ষীয়ে বৰ্মনক প্ৰায় ৩ ঘণ্টা সোধ-পোছ কৰিছিল৷ জিলা আয়ুক্তৰ অভিযোগক ভিত্তিহীন আখ্যা দি ষ্ট্ৰং ৰুমত নিৰাপত্তা থকাৰ সময়ত বাহিৰৰ লোকে প্ৰৱেশ কেনেকৈ কৰিলে বুলিহে প্ৰশ্ন কৰিছিল বৰ্মনে৷ ধন দাবী কৰা লোকজনক গ্ৰেপ্তাৰ কিয় কৰা নহ’ল তাকে লৈ তীব্ৰ চাঞ্চল্যৰ সৃষ্টি হৈছিল৷ লুইত কুমাৰ বৰ্মনৰ নামত ধন দাবী কৰা লোকজনক আজিলৈ চিনাক্ত কৰিব পৰা নাই বুলি জানিব পৰা গৈছে৷ জিলা আয়ুক্তৰ বিৰুদ্ধে উচ্চ ন্যায়ালয়ৰ দ্বাৰস্থ হোৱাৰো হুংকাৰ দিছিল বৰ্মনে৷ তাৰ মাজতে এক গোচৰত বৰ্ণালী ডেকাই লুইতৰ বিৰুদ্ধে ৰাজ্যিক মহিলা আয়োগৰ কাষ চপা বুলি জানিব পৰা গৈছে৷ ইপিনে শেহতীয়াকৈ লুইতে ৰাজ্যিক নিৰ্বাচনী বিভাগৰ মুখ্য বিষয়া অনুৰাগ গোৱেলৰ বিৰুদ্ধে গুৰুতৰ অভিযোগ আনিছে৷ এগৰাকী থলুৱা যুৱতীক শাৰীৰিক শোষণ কৰাই নহয় চাকৰিৰ পৰা বৰ্খাস্ত কৰাৰ অভিযোগ উত্থাপন কৰিছে বৰ্মনে৷ জ্যেষ্ঠ আমোলাৰ অভিসাৰক লৈ তথা লুইতৰ অভিযোগক লৈ জোকাৰণি উঠিছে দিছপুৰতো৷