জম্মু-কাশ্মীৰৰ পেহেলগামৰ ঘটনাক লৈ দেশ উত্তাল হৈ থকাৰ সময়তে পুনৰ গৌৰৱ গগৈৰ পাকিস্তান সংযোগক লৈ আজি আক্ৰমণৰ লক্ষ্য কৰি লয় মুখ্যমন্ত্ৰী হিমন্ত বিশ্ব শৰ্মাই৷ নাম নোলোৱাকৈ অসমৰ এজন সাংসদ বুলি উল্লেখ কৰি অসমৰ এগৰাকী সাংসদে পাকিস্তানৰ সন্ত্ৰাসবাদীৰ সৈতে সম্পৰ্ক স্থাপন কৰি আহিছে বুলি উল্লেখ কৰে মুখ্যমন্ত্ৰীয়ে৷ সেই বিস্ফোৰক তথ্য শীঘ্ৰে ৰাজহুৱা কৰা হ’ব বুলি কয় মুখ্যমন্ত্ৰীগৰাকীয়ে৷ চৰকাৰৰ অনুমোদন নোলোৱাকৈ সাংসদজনে ১৫ দিন ইছলামিক ৰাষ্ট্ৰত নামাজ পঢ়াৰ প্ৰশিক্ষণ লৈছিল বুলিও কয় মুখ্যমন্ত্ৰীয়ে৷ আজি উজনি অসমত পঞ্চায়ত নিৰ্বাচনৰ প্ৰচাৰ চলাবলৈ গৈ মুখ্যমন্ত্ৰীয়ে সাংবাদিকৰে মুখামুখি হৈ মুখ্যমন্ত্ৰীয়ে কয় যে এজন সাংসদে বিহুৰ ১৫ দিন ধৰি লুকাই আছে৷ বিহুৰ চান্দা দিব লাগিব বুলি লুকাই আছিল৷ গৌৰৱৰ সৈতে দত্তবুলি এজন লোকে টকা সংগ্ৰহ কৰাৰো গুৰুতৰ অভিযোগ উত্থাপন কৰে৷ মুখ্যমন্ত্ৰীয়ে লগতে কয় যে অসমৰ এজন সাংসদে পাকিস্তানৰ দূতাবাসৰ সৈতে সম্পৰ্ক ৰক্ষা কৰি আহিছে। সাংসদগৰাকীৰ বিৰুদ্ধে বহু গুৰুতৰ অভিযোগ আহি চৰকাৰৰ হাতত পৰিছে৷ এইবোৰ অহা ৩০ ছেপ্তম্বৰৰ আগতে চৰকাৰে ৰাজহুৱা কৰিব। অনুমোদন নোলোৱাকৈ ইছলামিক ৰাষ্ট্ৰত গৈ দূতাবাসৰ লগত থাকি এক সম্পৰ্ক স্থাপন কৰি আহিছে। ইছলামিক ৰাষ্ট্ৰত থাকি নামাজ পঢ়িবলৈ সাংসদগৰাকীয়ে ভালকৈ প্ৰশিক্ষণ লৈ অহা বুলি বহু বিস্ফোৰক মন্তব্য প্ৰকাশ কৰিছে মুখ্যমন্ত্ৰীয়ে। ঘৰত থাকি কোনোবাই শত্ৰুতা কৰিলে চিনি পোৱা নাযায়। বাহিৰৰ মানুহে শত্ৰু কৰিলে তাক চিনি পোৱা যায়।