মুখ্যমন্ত্ৰী হিমন্ত বিশ্ব শৰ্মাৰ মন্ত্ৰীসভাত নকৈ অন্তৰ্ভুক্ত মন্ত্ৰী ৰূপেশ গোৱালাই নিজ সমষ্টি ডুমডুমাত বাহৰ পাতি আছিল যদিও আজি গুৱাহাটীলৈ উভতি আহিছে৷ আজি ডিব্ৰুগড়ৰ মোহনবাৰী বিমান বন্দৰৰ পৰা গুৱাহাটী অভিমুখে উৰা মৰাৰ পূৰ্বে বিমানবন্দৰত সাংবাদিকক মনৰ কথা প্ৰকাশ কৰে৷ চাহ জনগোষ্ঠীৰ উন্নয়নৰ হকে কাম কৰি যোৱাৰ লগতে জনজাতিকৰণ, চাহ বাগিচাৰ শ্ৰমিকৰ মাটিৰ পট্টা, শিক্ষা আদি বিষয়ক লৈ গুৰুত্বপূৰ্ণ মন্তব্য প্ৰদান কৰিছে৷ মন্ত্ৰী ৰূপেশ গোৱালাই মুখ্যমন্ত্ৰীয়ে চাহ বাগিচা আৰু আদিবাসী এলেকাৰ লোকৰ হৈ কাম কৰিবলৈ পৰিকল্পনা কৰিছে আৰু যথেষ্ট কাম কৰিছে বুলি দাবী কৰে৷ তেওঁ কয় যে মুখ্যমন্ত্ৰীৰ পৰিকল্পনা যথেষ্ট আছে৷ কিন্তু মই তেওঁক সহযোগহে কৰিব লাগিব৷ পৰিকল্পানসমূহক লৈ আমি বহু সময়ত চৰ্চা কৰিছো৷ আমি একেলগে আগবাঢ়ি গ’লে বাগিচাৰ ৰাইজৰ সমস্যা সমাধান কৰিব পাৰিম৷ কিন্তু বাগিচা ৰাইজৰ সকলো সমস্যা একেলগে সমাধান কৰাটো সম্ভৱ নহয়৷ গোৱালাই গেৰাণ্টী দি কয় যে যোৱা কেইটামান বছৰত যিখিনি কাম হৈছে আৰু অনাগত দিনত যিখিনি কাম হ’ব সেয়া আগৰ চৰকাৰৰ বোৰতকৈ বহু ভাল কাম আৰু আগুৱাই যাব পৰা কাম হৈছে৷ শিক্ষাৰ ক্ষেত্ৰত বাগিচাৰ কাৰণে মুখ্যমন্ত্ৰীয়ে যিখিনি কাম কৰিলে সেইখিনি যুগান্তকাৰী বুলি দাবী কৰি মন্ত্ৰীগৰাকীয়ে কয় যে নতুন মডেল স্কুল স্থাপন কৰা হৈছে৷ ভৱিষ্যতে সেই বিদ্যালয়সমূহ উচ্চতমৰ মাধ্যমিক পৰ্যায়লৈ নিয়া হ’ব৷ বাগিচা এলেকাত নতুনকৈ ১০ খন মহাবিদ্যালয় স্থাপন কৰাৰ ঘোষণা কৰা হৈছে৷ আমাৰ চৰকাৰ বাগিচাৰ শিক্ষাক লৈ যথেষ্ট ছিৰিয়াছ আৰু অতিৰিক্ত শিক্ষক নিযুক্তি আৰু নতুন স্কুল প্ৰাদেশীকিকৰণ কৰা হ’ব৷ জনজাতিৰণৰ বিষয়টোত বিজেপি চৰকাৰে যিমান ছিৰিয়াছ সিমান আন চৰকাৰ নাছিল বুলি দাবী কৰি গোৱালাই কয় যে জনজাতিৰণৰ বিষয়টো বহু দূৰলৈ নিছে৷ জনজাতিকৰণ নোহোৱা পৰ্যন্ত কাম কৰাৰ ব্যৱস্থা কৰিছে৷ চাকৰিত সংৰক্ষণৰ ব্যৱস্থা কৰা হৈছে৷ চাহ বাগিচা এলেকাত আজিও শ্ৰমিকৰ মাটি পট্টা নাই আৰু ঘৰ নাই বুলি আক্ষেপ কৰি ডুমডুমাৰ বিধায়কগৰাকীয়ে কয় যে আমি মুখ্যমন্ত্ৰীক এই কথাটো জনাইছো৷ মুখ্যমন্ত্ৰীক আমি জনোৱা দাবীক সমৰ্থন জনাইছে৷ আমি মাটিৰ পট্টা দিবৰ বাবে কাম আৰম্ভ কৰিছো৷ চাহ বাগিচাৰ শ্ৰমিকে মাটি-ভেটিৰ অধিকাৰ পাব৷ ৰূপেশ গোৱালাক বিমানবন্দৰত ডিব্ৰুগড় জিলা অসম চাহ মজদুৰ সংঘৰ বিষয়-ববীয়াসকলে সম্বৰ্ধনা জনায়।