ডিজিটেল ডেস্কঃ বিশ্বৰ অপ্ৰতিৰোধ্য মল্লয়ুঁজাৰুগৰাকীক পৰাজিত কৰি পেৰিছ অলিম্পিকৰ ফাইনেলত প্ৰৱেশ কৰা ভাৰতীয় মহিলা মল্লযুঁজাৰু বিনেশ ফ’গাটক লৈ আজি গৌৰৱাম্বিত হৈ পৰিছে সমগ্ৰ দেশবাসী। ইতিমধ্যে অলিম্পিকত পদক নিশ্চিত কৰিবলৈ সক্ষম হোৱা বিনেশক প্ৰশংসাৰে উপচাই দিয়া হৈছে সামাজিক মাধ্যমতো। সমান্তৰালভাৱে তেওঁক এতিয়া অভিহিত কৰা হৈছে এগৰাকী প্ৰকৃত যোদ্ধাৰূপে, যিয়ে মুখেৰে নহয় কামেৰে প্ৰত্যুত্তৰ দিব জানে।

অলিম্পিকত ইতিহাস ৰচনা কৰা এইগৰাকী মল্লযুঁজাৰু বিনেশ ফ’গাটকে মাত্ৰ এটা বছৰ পূৰ্বে দেশদ্ৰোহী আখ্যা দিবলৈ চেষ্টা কৰিছিল একাংশ লোকে। দিল্লীৰ ৰাজপথত নিৰ্দয়ভাৱে চোঁচৰাই নিয়া হৈছিল এইগৰাকী ফ’গাটক, প্ৰহাৰ কৰা হৈছিল, গতা মাৰি দিয়া হৈছিল।

মল্লযুঁজৰ খেলপথাৰৰ পৰা আঁতৰত বিগত বৰ্ষৰ মে’ মাহত অলিম্পিকৰ পদক বিজয়ী বজৰং পুনিয়া আৰু সাক্ষী মালিককে ধৰি বিনেশ আৰু তেওঁৰ সতীৰ্থ মল্লযুঁজাৰুসকলে এক পৃথক যুদ্ধত অৱতীৰ্ণ হৈছিল। তেওঁলোকৰ এই যুঁজখন আছিল মল্লযুঁজ সন্থাৰ অধ্যক্ষ তথা বিজেপি সাংসদ ব্ৰীজ ভূষণ চৰণ সিঙৰ বিৰুদ্ধে। বিজেপি নেতাজনৰ বিৰুদ্ধে কেইবাগৰাকীও মহিলা মল্লযুঁজাৰুক যৌন নিৰ্যাতন চলোৱাৰ অভিযোগ তুলি তেওঁক নিলম্বনৰ দাবীৰে প্ৰতিবাদত নামিছিল বিনেশ, সাক্ষী, বজৰং পুনিয়াৰ দৰে মল্লযুঁজাৰুসকলে।

দিল্লীৰ যন্তৰ মন্তৰত তেওঁলোকৰ প্ৰতিবাদৰ পৰৱৰ্তী দৃশ্যই স্তম্ভিত কৰি তুলিছিল দেশৰ কোটি কোটি জনতাক। চৰকাৰৰ ইছাৰাত চলা দিল্লী আৰক্ষীয়ে অতি নিৰ্মমভাৱে আক্ৰমণ কৰিছিল প্ৰতিবাদকাৰীসকলক। আৰক্ষীয়ে বল প্ৰয়োগ কৰি প্ৰতিবাদকাৰী মল্লযুঁজাৰুসকলক আটক কৰি ৰাখিছিল, ইয়াৰ পিছতে নীৰজ চোপ্ৰাকে ধৰি শীৰ্ষ খেলুৱৈসকলে সমৰ্থন প্ৰকাশ কৰে।

এই প্ৰতিবাদৰ পৰিণামস্বৰূপে অৱশেষত ডব্লিউ এফ আই নিলম্বিত হোৱাৰ লগতে ব্ৰীজ ভূষণ শৰণ সিঙে নির্বাচনত থিয় নহ’ল যদিও ডব্লিউ এফ আইৰ নতুন সভাপতি নির্বাচিত সঞ্জয় সিঙেও প্রতিৰোধৰ সন্মুখীন হ’বলগীয়া হয়৷ অৱশেষত ২০২৪ চনৰ ফেব্ৰুৱাৰী মাহত মল্লযুঁজ খেলপথাৰলৈ ঘূৰি আহি বিনেশ ফ’গাটে ৫৫ কেজি শাখাত ৰাষ্ট্ৰীয় চেম্পিয়নশ্বিপ লাভ কৰে। তাৰ পাছত এক অস্বাভাৱিক পদক্ষেপত মাৰ্চ মাহত তেওঁ দুটা শাখাত প্ৰতিযোগিতাত অংশগ্ৰহণ কৰে – ৫০ কেজি আৰু ৫৩ কেজি – এছিয়ান ৰেছলিং চেম্পিয়নশ্বিপ আৰু এছিয়ান অলিম্পিক গেমছৰ কোৱালিফায়াৰৰ বাবে বাছনি ট্ৰাইলত লাইটাৰ বিভাগত বিজয়ী হিচাপে আত্মপ্ৰকাশ কৰে।

এপ্ৰিল মাহত বিনেশে এছিয়ান অলিম্পিক কোৱালিফায়াৰৰ ফাইনেলত প্ৰৱেশ কৰি মহিলাৰ ৫০ কেজি শাখাত অলিম্পিক কোটা অৰ্জন কৰিছিল। চাৰি মাহৰ পাছত বিনেশ এতিয়া ইতিহাসৰ শিখৰত থিয় দিছে। ইতিমধ্যে জাপানৰ বিশ্বৰ সৰ্বশ্ৰেষ্ঠ আৰু বর্তমানৰ অলিম্পিক চেম্পিয়ন ইউই ছুছাকিক আন্তঃৰাষ্ট্ৰীয় কেৰিয়াৰৰ প্রথমটো পৰাজয়ৰ বাট দেখুৱাইছে বিনেশে। ইয়াৰ পিছত ২০১৮ চনৰ ইউৰোপীয় চেম্পিয়ন ইউক্ৰেইনৰ অক্সানা লিভাচক পৰাস্ত কৰাৰ পিছত কিউবাৰ ইউছনেলিছ গুজমান লোপেজক পৰাস্ত কৰে।

বৃহস্পতিবাৰে মেটৰ ওপৰত আৰু বাহিৰত হোৱা সকলো অস্থিৰতাৰ পিছত ফ’গাটে কেৰিয়াৰৰ আটাইতকৈ ডাঙৰ মেচখনত একচনত অংশগ্ৰহণ কৰিব। কিন্তু এতিয়া সকলোৱে একেমুখে স্বীকাৰ কৰিছে যে বিনেশ ফ’গাট ইতিমধ্যেই এগৰাকী চেম্পিয়ন।