চাইবাৰ অপৰাধীয়ে বহু মানুহক দেউলীয়া কৰিছে৷ অজ্ঞাতে চাইবাৰ অপৰাধীয়ে বেংকৰ একাউণ্টৰ পৰা ধন হৰলুকি কৰি বহু লোকক দেউলীয়া কৰিছে৷ ডিপ ফেক ফটো-ভিডিঅ’ যোগে মানুহক বদনাম কৰা হয়৷ সামাজিক মাধ্যমৰ একাউণ্ট, মেইল হেক কৰা হয়৷ ইণ্টাৰনেট, স্মাৰ্ট ফোন আৰু ডিজিটেল যুগত মানুহ যেতিয়াই-তেতিয়াই চাইবাৰ অপৰাধীৰ আক্ৰমণৰ বলি হ’ব পাৰে৷ যাৰ বাবে এতিয়াৰ প্ৰজন্মক চাইবাৰ অপৰাধ ৰোধৰ প্ৰশিক্ষণৰ প্ৰয়োজন৷ কেনেদৰে ছাত্ৰ সমাজ তথা যুৱ প্ৰজন্মই চাইবাৰ অপৰাধ ৰোধ কৰিব৷ তাকে প্ৰশিক্ষণ দিবলৈ বিশেষ ব্যৱস্থা কৰিছে অসম জাতীয়তাবাদী যুৱ-ছাত্ৰ পৰিষদে৷ গ্ৰীষ্ম বন্ধৰ সময়ছোৱাত নাচ-গানৰ প্ৰশিক্ষণ দিয়াৰ পৰিৱৰ্তে অসম জাতীয়তাবাদী যুৱ-ছাত্ৰ পৰিষদ লাহোৱাল আঞ্চলিক কমিটীয়ে ৭ দিনীয়াকৈ ‘Ethical Hacking আৰু Training’ শীৰ্ষক প্ৰশিক্ষণ শিবিৰ অনুষ্ঠিত কৰে৷

গ্ৰীষ্মবন্ধ উপলক্ষে ১৬ জুলাইৰ পৰা ২২ জুলাইলৈ অনুষ্ঠিত কৰা ‘Ethical Hacking আৰু Training’ প্ৰশিক্ষণ শিবিৰৰ আজি সামৰণি পৰে৷ আজি অনুষ্ঠিত সামৰণি অনুষ্ঠানত শিবিৰত অংশ লোৱা লাহোৱাল অঞ্চলৰ প্ৰশিক্ষার্থীসকলক প্ৰমাণপত্ৰ প্ৰদান কৰে জাতীয় সংগঠনটোৱে৷ এই অনুষ্ঠানতে হাতখোলা গাঁৱৰ খেতিয়ক, অৱসৰপ্ৰাপ্ত চৰকাৰী কৰ্মচাৰী তথা সমাজকৰ্মী নৃপেন দত্তক ‘শ্ৰেষ্ঠ অভিভাৱক সন্মান’ প্ৰদান কৰে অসম জাতীয়তাবাদী যুৱ ছাত্ৰ পৰিষদৰ লাহোৱাল আঞ্চলিক সমিতি আৰু ডিব্ৰুগড় বিশ্ববিদ্যালয় গোটে৷ এই অনুষ্ঠানত লাহোৱালস্থিত এছ কে এছ ইংলিছ একাডেমিৰ মুখ্য পৰিচালন সঞ্চালক ড০ দয়ানন্দ শ্বাহ মুখ্য অতিথি হিচাপে উপস্থিত থাকি কয় যে অসম জাতীয়তাবাদী যুৱ-ছাত্ৰ পৰিষদে এই প্ৰশিক্ষণৰ যোগেদি শিক্ষাৰ্থীক হেকিঙৰ বিভিন্ন দিশত জ্ঞান আৰু দক্ষতা বৃদ্ধি কৰিছে৷ নিৰ্দিষ্ট দক্ষতা সামৰি অনাগত দিনত সমাজখনক চাইবাৰ সুৰক্ষা সম্পৰ্কে শিক্ষাৰ্থীসকলে সজাগ কৰিব পাৰিব বুলি আমি আশাবাদী৷

লাহোৱাল প্ৰাথমিক বিদ্যালয়ত অনুষ্ঠিত ৭ দিনীয়াকৈ অনুষ্ঠিত গ্ৰীষ্মকালীন প্ৰশিক্ষণ শিবিৰত লাহোৱাল অঞ্চলৰ বহু ছাত্ৰ-ছাত্ৰীয়ে অংশগ্ৰহণ কৰে। এই কাৰ্যসূচীত নিষ্ঠা আৰু সক্ৰিয় অংশগ্ৰহণ কৰা ছাত্ৰ-ছাত্ৰীক ভূয়সী প্ৰশংসা কৰিছে যুৱ-ছাত্ৰ পৰিষদে। এই প্ৰশিক্ষণ শিবিৰত অংশ লৈ হেকিঙৰ বিভিন্ন দিশত জ্ঞান আৰু দক্ষতা বৃদ্ধি পোৱা ছাত্ৰ-ছাত্ৰীয়ে সমাজখনক চাইবাৰ সুৰক্ষা সম্পৰ্কে সজাগ কৰিব পাৰিব বুলি আশা প্ৰকাশ কৰিছে অসম জাতীয়তাবাদী যুৱ-ছাত্ৰ পৰিষদৰ লাহোৱাল আঞ্চলিক সমিতিয়ে৷