জলসম্পদ বিভাগৰ কৰ্মচাৰী মাধুৰ্য বৰুৱাৰ হত্যাকাণ্ডই জোকাৰি গৈছে সমগ্ৰ উজনি অসমক৷ নিজ পত্নীয়ে প্ৰেমীকৰ সৈতে লগলাগি মাধুৰ্য বৰুৱাক হত্যা কৰাৰ তথ্য পোহৰলৈ অহাৰ পাছতে আজি ডিব্ৰুগড়ৰ চাবুৱা আৰক্ষী থানাত উত্তপ্ত পৰিস্থিতিৰ সৃষ্টি হয়৷ প্রহেলিকা বৰুৱাক হত্যাকাণ্ডত সহায় কৰিছিল প্ৰেমীক ময়ুন্ত গগৈ আৰু ভাস্কৰ শইকীয়াই৷ আৰক্ষীয়ে মাধুৰ্য বৰুৱাৰ হত্যাকাৰী পত্নী আৰু দুই সহযোগীক গ্ৰেপ্তাৰৰ পাছতে চাবুৱা জেৰাই গাঁৱৰ উত্তেজিত ৰাইজে চাবুৱা আৰক্ষী থানা ঘেৰাও কৰে৷ চাবুৱা আৰক্ষী থানা থানাত ভিৰ কৰি ৰাইজে দোষীক কঠোৰ শাস্তিৰ দাবী জনায়৷ ৰাইজে বিভিন্ন শ্ল’গান প্ৰদান কৰি ৰাজপথ অৱৰোধ কৰি আকাশ-বতাহ কপাই তোলে৷ আৰক্ষীয়ে উত্তেজিত ৰাইজক নিয়ন্ত্ৰণ কৰিবলৈ দীৰ্ঘ সময় প্ৰয়াস কৰিবলগীয়া হয়৷ পাছত আৰক্ষীয়ে প্রহেলিকা বৰুৱা, ময়ুন্ত গগৈ আৰু ভাস্কৰ শইকীয়াক কঠোৰ শাস্তি বিহাৰ আশ্বাস প্ৰদান কৰাত পৰিস্থিতি ক্ষান্ত হয়৷ উল্লেখ্য যে, ডিব্ৰুগড় জিলাৰ চাবুৱা জেৰাই গাঁৱত ১০ ছেপ্টেম্বৰত নৃশংস হত্যাকাণ্ড সংঘটিত হৈছিল। নিশা ঘৰৰ ভিতৰতে চোকা অস্ত্ৰৰে দুৰ্বৃত্তই হত্যা কৰিছিল জলসম্পদ বিভাগৰ কৰ্মচাৰী মাধুৰ্য বৰুৱাক। অমায়িক ভদ্ৰ জলসম্পদ বিভাগৰ কৰ্মচাৰীক শোৱা পাটীতে দুৰ্বৃত্তই হত্যা কৰে। পত্নী আৰু কণমানি কন্যাৰ সন্মুখত চোকা অস্ত্ৰ আৰু ধুমুচেৰে মূৰত আঘাত কৰি নিৰ্মমভাৱে হত্যা কৰা হৈছিল মাধুৰ্য বৰুৱাক। নিশা শুই থকা অৱস্থাত দুৰ্বৃত্তই হত্যা কৰা পাছতেই স্থানীয় ৰাইজে হত্যাকাণ্ডত পৰিয়ালৰ লোক জড়িত থাকিব পাৰে বুলি সন্দেহ কৰিছিল। আৰক্ষীয়ে তদন্ত আৰম্ভ কৰিছিল। ছীল কৰিছিল গৃহটো। মাধুৰ্য বৰুৱাৰ পত্নীৰ লগতে পৰিয়ালৰ বিভিন্নজনক জেৰা চলাইছিল চাবুৱা আৰক্ষীয়ে। চাবুৱা আৰক্ষীয়ে নিশাই মাধুৰ্য্য বৰুৱাৰ পত্নী প্রহেলিকা বৰুৱা, ময়ুন্ত গগৈ আৰু ভাস্কৰ শইকীয়াক গ্ৰেপ্তাৰ কৰিছে। পত্নী প্রহেলিকা বৰুৱাই সু-নিৰ্দিষ্ট পৰিকল্পনাৰে হত্যা কৰিছিল স্বামী মাধুৰ্য বৰুৱাক। নিজ স্বামীক পৰকীয়া প্ৰেমৰ বাবেই হত্যা কৰা বুলি জানিব পৰা গৈছে। ডিব্ৰুগড়স্থিত জলসম্পদ বিভাগৰ মাণ্ডলিক কাৰ্যালয়ৰ কৰ্মচাৰী মাধুৰ্য বৰুৱা সহজ, অমায়িক ব্যক্তি আছিল। ৰাইজে সন্দেহ কৰাৰ দৰেই পত্নীৰ দ্বাৰা পৰিকল্পিত হত্যাকাণ্ড আছিল।